දීප්ත ග්‍රහයෝ පුද්ගලයන් බබළවති

0
103
දීප්ත ග්‍රහයෝ
දීප්ත ග්‍රහයෝ

ග්‍රහයන්ගේ එක තත්ත්වයක්‌ තමයි ග්‍රහ අවස්‌ථා කියන්නේ. ඒ වගේ අවස්‌ථා 10 ක්‌ හැම ග්‍රහයෙකුටම තිබෙනවා. මේ අවස්‌ථා අනුව ග්‍රහයන්ගේ ඵල දෙන තත්ත්වයද වෙනස්‌ වෙනවා. මෙයින් අපට හමුවන හොඳම තත්ත්වය තමයි දීප්ත කියන්නේ. දීප්ත කියන්නේ ග්‍රහයෙක්‌ ශුභ තත්ත්වයෙන් උච්ච රාශිගත වෙන එක නේ. ඔය ඕනම කෙනකුගේ උපදින කොට දීප්ත තත්ත්වයෙන් ලග්නයේ ඉන්න දීප්ත ග්‍රහයෝ ජීවිතය සුන්දර කරන්නම තමයි බලන්නේ. දෙවැනි භාවයේ ඉන්නව නම් ධනය අතින් ඔබ පොහොසත් කරනව තමයි. ඒ විතරක්‌යෑ ඕනම සමාජයක ඔබත් නොදැනීම ඔබ නායකයෙක්‌ වෙනව. ඒ විතරක්‌යෑ තුන්වැනි භාවයේ දීප්ත තත්ත්වයෙන් ග්‍රහයෙක්‌ ඉන්නව කියමුකෝ… ඔබේ වික්‍රමයන් ගම් පළාතේ විතරක්‌ නෙවෙයි රටේත් ප්‍රසිද්ධ වෙනව තමයි.

04 වැනි භාවයේ ඔබගේ දීප්ත ග්‍රහයෝ ඉන්නවා නම් තම මවගෙන් ලැබිය යුතු දේ නොඅඩුව ලැබෙනවා පමණක්‌ නෙවෙයි පොළොවෙන් මුතු මැණික්‌ ආදියද ලැබෙන්න තියෙන ඉඩකඩ වැඩියි. ඒ වගේම බුධ ගුරු රවි සෙනසුරා කේතු වගේ ග්‍රහයෙක්‌ 05 වැනි භාවයේ දීප්ත තත්ත්වයෙන් ඉන්නවා කියමුකෝ. එතකොට ඔබට උසස්‌ අධ්‍යාපනයක්‌ ලැබෙන්න වාසනාව තියෙනවා. ඒ විතරක්‌ නෙවෙයි අධ්‍යාපනයෙන් ඔබ බැබලෙන තත්ත්වයටද පත්වෙනවාමයි. 06 වැනි භාවයේ වුණත් දීප්තව ඉන්නවා නම් ඔබේ ලෙඩ දුක්‌ කලින් දැනගන්න ඉඩක්‌ ලැබෙනවා. ඒ වගේම සංසාරගත සතුරන් කොහොමත් අඳුරගන්න හොඳ ඉවක්‌ ලැබෙනවා.

දීප්ත ග්‍රහයෝ

එසේම 07 වැනි භාවයේ උපතේදී සුබ ග්‍රහයන් දීපත් තත්ත්වයෙන් නම් හොඳ බිරිඳක්‌, සැමියෙක්‌ ලැබෙනවා. ඒ වගේම බාහිර පාර්ශ්වයන් සමග කරන ඕනම ගනුදෙනුවකදී ලාභ ලැබෙනවා. 08 වැනි භාවයේ ග්‍රහයන් උපතේදී දීප්තව සිටීම බාහිර පාර්ශ්ව සමග කරන ගනුදෙනුවලදී ධන ලාභ වගේම බොහෝ දෙනාගේ මතකයේ රැඳෙන ක්‌ෂණික මරණයකටත් හේතු වෙනවා. 09 වැනි භාවයේ දීපත් තත්ත්වයෙන් සිටින ඕනෑම ග්‍රහයෙක්‌ සුබඵල දෙනව තමයි.

10 වැනි භාවයේ දීප්තව සිටින ගුරු, රවි, කුජ වගේම නරකම කියලා හිතන සෙනසුරා වුණත් බොහෝ රැකියා ලාභ දෙනවා වගේම රාජ්‍ය ලැබීම් වුණත් ලබා දෙනවා. 11 වැනි භාවයේ උපතේදී ඕනෑම ග්‍රහයෙක්‌ දීප්තව සිටියොත් ස්‌ථාවර ලැබීම් ඇති කරවනවා වගේම 12 වැනි භාවයේ දීප්තව සිටී නම් වියදම් සීමා කරනවා වගේම ඉතිරි කරන්නත් පොළඹවනව.

අපි අද බලමු මේෂ ලග්නයෙන් උපත ලැබූ ඔබගේ දීප්ත ග්‍රහයො කවුද… මොනවද කරන්නේ කියල. ඔබ උපදින කොටම මේෂ රාශියේ රවි ඉන්නව නම් දීප්තයි. ඒ වගේම වෘෂභ රාශියේ රාහු තැන්පත්ව හිටියත් දීප්තයි. කටක රාශියට ගුරු වගේම නැප්චූන්ද දීප්තයි. සිංහ රාශියට ප්ලුටෝ දීප්තයි. කන්‍යා රාශියේ බුධ හිටියත් දීප්තයි. තුලාවට සෙනසුරා දීප්තයි. වෘශ්චික රාශියට යුරේනස්‌ වගේම කේතුද දීප්ත වෙනවා. ඒ වගේම මකර රාශියට කුජ දීප්ත වෙනවා වගේම මීන රාශියේදී සිකුරු දීප්ත වෙනවා.

මේ තත්ත්වය ඒ ඒ ලග්නවලට බලපාන ආකාරය

මේෂ ලග්නය

ඔබ මේෂ ලග්නයේ උපත ලැබූ විට ලග්නයේ රවි ඉන්න එක දීප්තයි. ඒ වගේම ඉතා හොඳයි. ඔබ ඉපදිලා තියෙන්නේ රවි ලෝකයට එළිය අරගෙන එන සුබ උදෑසනක. ඒ නිසා ඔබ නිතරම ඉන්නේ පිබිදුන ශක්‌තියෙන්.

දෙවැනි භාවයේ රාහු ඉන්න එකත් හොඳයි. ධනය ලැබීම් අතින් වේගවත් වෙනවා විතරක්‌ නෙවෙයි. නිතරම සල්ලි තමයි දෙවියන්ගේ මල්ලි කියලම තමයි හිතන්නේ. ආත්මාර්ථකාමී වෙන්නේ ලෞකික ජීවිතයේ සම්පත් වැඩිකර ගන්නය. ඇසුරු කරන්නන් හිතන්නේ ආත්මාර්ථකාමීය කියලම තමයි. ඒත් දියුණු වෙන්න නම් ආත්මාර්ථකාමී වෙනත් ඕනම තමයි. හැබැයි පිටිං බලන් ඉන්න අය කියන්නේ දහංගැටකාරයෙක්‌ කියලම තමයි.

දීප්ත ග්‍රහයෝ

ඒ වගේම ඔබගේ 05 වැනි භාවයේ ප්ලූටෝ ඉන්න එකත් දීප්තයි. නිතර බලන්නේ ඉගෙනීමටයි. අලුත් අත්හදා බැලීම් කිරීමට නිතර පෙළෙඹෙනවා. දැනීම දියුණු කර ගන්න බලනවා. නිතර නිතර දැනුම එකතුවන වාද විවාදවලට පැටලෙන්නත් බලනවා. එයින්ද දැනුම හදාගන්න තමයි බලන්නේ.

හයවැනි භාවයේ බුධ උපතේදී තැන්පත් නම් ලෙඩ දුක්‌ කරදර කලින් හඳුනාගැනීමට ඉඩ ලැබෙනවා. සංසාරගත සතුරන් හිටියත් ඔවුන් හඳුනා ගැනීමට හොඳ ඉවක්‌ ලැබෙනවා. ඒ නිසාම අනතුරට කල්යල් බලා නියමෙට මුණ දෙනවා.

ඒ වගේම 07 වැනි භාවයේ තැන්පත් සෙනසුරා දීප්තයි. දිග්බල සහිතව මෙහි සිටින සෙනසුරු යෝධ බල යෝධ ශක්‌තිය ලබා දෙනවා. උපන් තත්ත්වය වගේ සිය දහස්‌ ගුණයක්‌ දියුණු කිරීමට බලනවා. යුග දිවියේ ගැටළු තිබුණත් සමාජයට වටිනා සම්පතක්‌ වෙනවා. රටට වැඩදායක වගේම ගමක, පළාතක, රටක නායකයෙක්‌ වීමට වාසනාව ලැබෙනවාම තමයි.

උපතේදී 08 වැනි භාවයේ තැන්පත් යුරේනස්‌ද දීප්තයි. දෛනික ජීවිතයේ මූණදෙන විවිධ ගැටළු සඳහා මුහුණදෙන ශක්‌තිය මේ මගින් ලැබෙනවම තමයි. ඒ වගේම ඕනම දුකකට ඔරොත්තු දෙනවා විතරක්‌ නෙවෙයි බොහෝ දෙනකු කතා කරන ක්‌ෂණික මරණයකටද හේතුය.

මේෂ ලග්නය හිමි ඔබගේ උපතේදී 10 වැනි භාවයේ කුජ තැන්පත් වී ඇත්නම් දීප්තයි. ඒ වගේම දිග් බලයි. අරක්‌ෂක අංශයේ උසස්‌

රැකියා සඳහා ඉතා සුදුසුය. ඒ වගේම නිර්භීතය. කියන දේ කෙළින් කියයි. කෙළින් තීරණ ගනී. හැංගි හොරා වැඩ නැත. තියුණු බැල්මකි. තියුණු පෞර්ෂයකි. රැකියා ස්‌ථානයේ මිතුරන් මෙන්ම සතුරන්ද සිටී. සියලු දෙනාගෙන් වැඩ ගැනීමට නියම දක්‌ෂයෙකි.

එසේම මේෂ ලග්නකරුවාගේ 12 වැනි භාවයේ උපතේදී තැන්පත් සිකුරු වියදම් අවම කරවයි. ශරීර සැප උදෙසා සිකුරු වියදම් කළද දීපත් තත්ත්වයෙන් සිටින සිකුරු සේ නොකරයි. උපයන දෙයින් කොටසක්‌ කෙසේ හෝ ඉතිරි කරයි. ආදායම් සීමිත වුවද වියදමද අවම කර ගැනීමට ශක්‌තියක්‌ ලැබේ. ඉතිරි කිරීම සතෙන් සුතේ වුවද නොදැනීම බොහෝ සම්පත් ඉතිරි වෙලාය. එය ධන සම්භාරයක්‌ වී අවසන් කාලය වාසනාවන්ත කරයි.

දීප්ත ග්‍රහයෝ

කෙනකු උත්පත්තියේ දී පිහිටන ග්‍රහ තත්ත්වය මේ විදියටමයි කියන්න කොහොමත් බැහැනේ. ඔය ග්‍රහයො එක එක තැන ඉන්නවා විතරක්‌ නෙවෙයි එක එක්‌කෙනා එක්‌ක සංයෝගත් වෙලානේ ඉන්නෙ. ඒ වගේම එකම රාශියේ ග්‍රහයො හතරදෙනා. පස්‌දෙනා. නැත්නම් තුන්දෙනා. දෙන්නා විදියටත් ඉන්නව නේ…? එතකොට මේ තත්ත්වය කොහමත් වෙනස්‌ වෙලා අමුතු ගති ගුණ තමයි පේන්නෙ. හැබැයි අනිත් ග්‍රහයන්ට වැඩිය දීප්ත තත්ත්වයේ ඉන්න ග්‍රහයා බලවත් වෙනවම තමයි.

මේකත් පිහිටන්නේ සංසාර පින් පව් අනුවම තමයි. දීප්ත ග්‍රහයන්ගෙන් ලොකු ශක්‌තියක්‌ ලැබෙනා කියන්නේ අපි සංසාරේ පින් කරලා තියෙනවා කියන එකනේ. එහෙම නැත්නම් හිත හිතා ඉඳලා වැඩක්‌ නැහැනේ. මේ භවය වගේම අනිත් භවයත් දීප්ත වෙන්න ඕන විදියට හැසිරෙන එක තමයි කරන්න තියෙන්නේ. ඒ කියන්නේ ගතින් ඔය පේන්න කරන පින් හිතිනුත් කළාම ඉවරයිනේ. එතකොට උපතේදී කොහොම ග්‍රහයා හිටියත් එයාලගේ ගෝචර ගමනේදී හරි හොඳම දේ තමයි කරන්න බලන්නෙ.

අද මේෂ ලග්නයේ දීප්ත තත්ත්වයත් එක්‌ක අප හමුවුණා වගේම ඉදිරි සතියකදී වෘෂභ ලග්නයේ දීප්ත ග්‍රහ තත්ත්වයත් එක්‌ක හමු වෙමුකෝ.

We found this article from Divaina on 2013/09/29.