ලෙඩ රෝග ග්‍රහ දෝෂ හා ප්‍රතිකාර

0
84
ලෙඩ රෝග
ලෙඩ රෝග

ලෙඩ රෝග පිළිබඳව ජන්ම පත්‍ර පරීක්‍ෂා කිරීමේදී විශේෂයෙන් ක්‍ෂේත්‍රයේ රාශි පිළිබඳ සැලකිලිමත් විය යුතුය. මිනිස්‌ ශරීරය සෑදී තිබෙන්නේ ආපෝ, තේජෝ, වායෝ, පඨවි යන සතර මහා භූත රූපයන් ගෙනි. ආපෝ යනු වැගිරෙන ගලන ස්‌වභාවයටය. එබැවින් මිනිස්‌ සිරුරේ ලේ, සෙම්, ඕජස්‌ ආදිය එයට අයත් වෙයි. තේජෝ යනු උෂ්ණය, ගින්දර, පාට යන ස්‌වභාවයන්ය. එනිසා මිනිස්‌ සිරුරේ උෂ්ණය, පිත ආදිය අයත් වෙයි. මේවා වෙනස්‌වන සුළුය.

වායෝ යනු ඇකිලෙන, පිම්බෙන, දිගහැරෙන ගතියයි. ඒ අනුව මිනිස්‌ සිරුරේ අතපය දිග හැරීම, නැමීම, ආස්‌වාස ප්‍රාස්‌වාස කිරීම, මළමුත්‍ර පහ කිරීමේ වේගය, වේදනා කැක්‌කුම් ආදියට මූලික වෙයි. පඨවි යනු මටසිලුටු (මෘදු) තද ආදි ගතියයි. මිනිස්‌ සිරුරේ මාංශය – ඇට ආදිය එය නියෝජනය වෙයි.

මිනිස්‌ සිරුර එසේ සකස්‌ වන විට මේෂයේ පටන් මීනය දක්‌වා මේ රාශි 12 ද සතර මහා භූතයන්ට අයත්ව තිබේ. ඒ අනුව මේෂ, සිංහ, ධනු යන රාශි තේජෝ හෙවත් උෂ්ණ ස්‌වභාවය ගනී. මිථුන, තුලා, කුම්භ යන රාශි තුන වායෝ භූතයට අයත්වෙයි. එසේම ආපෝ හෙවත් වැගිරෙන – ගලන – ජලයට සම්බන්ධ වන්නේ කටක, වෘශ්චික, මීන යන රාශි තුනය. පඨවි හෙවත් තද හෝ මටසිලුටු යන ගතියට අයත් වන්නේ වෘෂභ, කන්‍යා, මකර යන රාශීන්ය.

ජලයට අයත් රාශි

මේ අනුව කටක රාශිය පිළිබඳ සලකා බැලීමේදී එය ජලයට අයත් ආපෝ ධාතු වන්නේය. කටකයේ ස්‌වභාවය දැඩි සීතල ස්‌වභාවයකි. එසේම මිනිස්‌ සිරුරේ පපුව, හෘදය වස්‌තුව, පෙනහලු, පියයුරු ආදිය එයට අයත්කර තිබේ. එබැවින් කටක රාශිය තම කේන්ද්‍රයේ කොතැනක පිහිටා තිබුණත් එහි තත්ත්වය නරක ග්‍රහ බලපෑම් නිසා දුර්වල මට්‌ටමකට වැටෙන හෙයින් නියත ලෙසම සෙම් ආශ්‍රිතව පපුවේ රෝග පීඩා ඇතිකළ හැකිය.

විශේෂයෙන් කුජ වැනි ග්‍රහයෙක්‌ කටකය තුළ සිටීම හෝ සෙනසුරු වැනි ග්‍රහයෙක්‌ අශුභ ලෙස දැකීම හෝ සිදු වුවහොත් ලේ සම්බන්ධව ආබාධතා මතු කරයි. මේවා වඩා වේගවත්ව ඇති වීමට කටකය තුළ අශුභව සිටින හෝ දකින ග්‍රහයන්ට අයත් මහ දශා අතුරු දශාද පැමිණිය යුතුය. නිදසුනක්‌ ලෙස දැක්‌වීමේදී මිථුන ලග්න හිමියකුගේ දෙවැනි භාවය කටක රාශිය වෙයි. එහි ඉහත කී පරිදි යම් ග්‍රහ බලපෑමකින් පීඩාවී තිබේනම් එසේම කටක රාශිය අධිපති සඳු ග්‍රහයාද පීඩාවී තිබේනම් (පීඩාවීම යනු සඳු අශුභ ස්‌ථානවල එනම් කේන්ද්‍රයේ 06-08-12 වැනි ස්‌ථානවල සිටීම) හෝ නපුරු ග්‍රහයන්ට සංයෝගව නැතිනම් නපුරු ග්‍රහයන්ගේ දැක්‌මට ලක්‌වී සිටීම සඳු පීඩාවකට ලක්‌ව සිටීම වේ.

ලෙඩ රෝග

එනිසා සඳුට අයත්වූ පපුව, පෙනහලු, හෘදය, පියයුරු වශයෙන් පපුව ආශ්‍රිතව සහ හිස, මුහුණ, බෙල්ල ආදි ස්‌ථානවලද රෝග තත්ත්වයන් මතුකරයි. ඒ හේතුව වන්නේ මිථුන ලග්නයට දෙවැන්න කටක රාශිය වීමය. කේන්ද්‍රයේ 2 වැන්නෙන් හිස, මුහුණ, බෙල්ල ගැන බලය පවතින නිසාය. එනිසා උගුර, කන්, හිස මෙන්ම පපුව ආශ්‍රිතව සෙම් අසනීපතා වර්ධනය විය හැකිය.

ගිනියම් රාශි

කුජ ගිනියම් ග්‍රහයෙකි. කටකය සීතල වතුරකි. ඒ නිසා කුජගේ ගිනියමට ප්‍රතිවිරුද්ධ වෙයි. එනිසා කුජ එම රාශිය තුළ නීච වෙයි. කුජ නිසා කටකයේ සීතල ගතිය දුරුවෙයි. මේ ක්‍රියාකාරිත්වය නිසා එම ජන්මියාට අධික පෑවිල්ලත් සීතල වර්ෂා කාලයත් අගුණ වෙයි. මේ දෙකාලයම සෙම් ආශ්‍රිත රෝග වර්ධනය වෙයි. සීත කළ ආහාර පාන මෙන්ම උෂ්ණාධික ආහාරද අගුණ වෙයි. ජලයට ප්‍රියතාවය ඇතත් ජලය ඔවුන්ට විරුද්ධය.

මෙම තත්ත්වයන් විනිවිද පරීක්‍ෂා කිරීමේදී කටක රාශිය පමණක්‌ නොව කටකයෙන් 04 වැන්නද බැලිය යුතුය. මිථුන ලග්න හිමියාට කටක රාශිය දෙවැන්න වනවිට කටකයෙන් උතුරට 04 වැන්න වන්නේ තුලා රාශියයි. එනම් මිථුනයෙන් 5 වැන්නය. එසේම කටක රාශියෙන් දකුණට 04 වැන්න වන්නේ මේෂ රාශියයි. එනම් මිථුනයෙන් 11 වැන්නය. එම රාශි හඳුන්වන්නේ කටකයෙන් චතුරශ්‍ර රාශි ලෙසටය. එසේම කටකයේ සිට සම සප්තම හෙවත් 07 වැන්න වන්නේ මකර රාශියයි. මෙය ත්‍රිකෝණයකි. කටක රාශිය එසේ පීඩා වනවිට මෙම චතුරස්‍ර 7 වැනි රාශියද පීඩා වෙයි. මේ නිසා එම මිථුන ලග්න හිමියාගේ 5 වැන්නවූ තුලාවෙන් කියවෙන උකුල් ඇට, වකුගඩු ආදියේද මේෂ රාශියෙන් කියවෙන හිස සම්බන්ධ ශරීර කොටස්‌වලද මකරයෙන් කියෑවෙන දණහිස්‌ සම්බන්ධයෙන්ද නිරෝගී බව නැති කරයි.

ලෙඩ රෝග

විශේෂයෙන් මෙම මිථුන ලග්න හිමියාට මෙම තත්ත්වය බලපාන්නේ වඩාත්ම හිසටය. ඒ මේෂ රාශියද දුර්වලවූ බැවිනි. මෙම ජන්මියාගේ කටකය තුළ කුජ සිටියා යයි සිතමු. 12 වැන්න වූ වෘෂභය තුළ සෙනසුරු සිටියා යෑයි සිතමු. කටක අධිපති සඳු 06 වැන්න වූ වෘශ්චික රාශියේ සිටියා යයි සිතමු. එවිට කටක අධිපති සඳු නීචව සෙනසුරුගෙන්ද පීඩා වෙයි.

සඳු කුජට අයත් රාශියේත් කුජ සඳුට අයත් රාශියේත් සිටිමින් පරිවර්තන යෝගයක්‌ උදා කළද එය ධනය ලැබීම පැත්තට යම් සුගතියක්‌ ඇති කළත් නිරෝගී බව බිඳවැටේ. අතරමැදියෙක්‌ ලෙස සෙනසුරුට කටක රාශිය හා කුජ පෙනීමත් කටක රාශි අධිපති සඳු පෙනීමත් නිසා තත්ත්වය සංකීර්ණ කරයි.

මෙවන් කෙනෙක්‌ වෛද්‍ය ප්‍රතිකාරවලට යොමුවන විට වෛද්‍යවරයාට පවසන්නේ සෙම ආශ්‍රිතව ඇතිවන පීඩාවය. හිසත් පපුවත් පිළිබඳවය. නොයෙක්‌ වෛද්‍ය පරීක්‍ෂණවලට පෙනී සිට අවශ්‍ය වෛද්‍ය ප්‍රතිකාර ගනී. භෞතික වශයෙන් එම ප්‍රතිකාර නිසා එම රෝග තත්ත්වයන් තරමක්‌ පාලනය වෙයි. මෙයට එම ජන්මියා රැවටෙයි. මෙසේ පාලනය වී ගියද කටකයෙන් චතුරශ්‍රවූ තුලාවද පීඩාවූ නිසා උකුල් ඇට, යටිබඩ ආදි ස්‌ථානවල ඉදිමුම්, වේදනා, කැක්‌කුම් මතුවිය හැකිය. ටික කලක්‌ යනවිට ජන්මියාට ඒ අමාරුවලටද ප්‍රතිකාර ගතයුතු වෙයි.

එසේ කරමින් යනවිට නැවත හිස පපුව ආදී ස්‌ථානවල පෙර පැවැතියාක්‌ මෙන් යළි අසනීප මතුවෙයි. විශේෂයෙන් මෙලෙස බෙහෙත් කළත් නිට්‌ටාවට සුව නොලබමින්, තාවකාලික සහනය ලබමින් ජීවත්වීමට සිදුවන්නේ සඳුගේ මහදශාවේ ශනි අතුරුදශා, කුජ අතුරුදශා එසේ නැත්නම් ශනි මහදශා, සඳු, කුජ අතුරුදශා විදසා ආදී දශාවන් ගෙවන කාලවලය. සඳුගේ නම් වසර 10 ක කාලයකි. ශනි ගේනම් 19 වර්ෂයකි. කුජ ගේ නම් වර්ෂ 07 කි. ඒ ඒ පිහිටීම්වලට අනුකූලව ජීවිතය නිරෝගී බව අහිමි වෙයි.

පෙර පාප බල

වෛද්‍ය ප්‍රතිකාර අනිවාර්යයෙන් කළ යුතුය. එහෙත් මෙම රෝගාබාධ ඇති වන්නේ පෙර පව් හරහාය. ඒවා නියෝජනය කරන ග්‍රහයන් සිටී. ඒ විශ්ව ශක්‌තියයි. මෙම මිථුන ලග්න හිමියාට එකී විශ්ව ශක්‌ති වූයේ කුජ, චන්ද්‍ර හා ශනි යන ග්‍රහයන්ය. එනම් එය ආධ්‍යාත්මය වෙයි. රෝගය මිනිස්‌ ජීවිතයට ප්‍රබලම අශුභ ඵලයකි.

ලෙඩ රෝග

මෙම අශුභ ඵලය හටගැනීමට හේතුවක්‌ ඇත. එනම් පෙර පාප බලයයි. එම හේතුව ක්‍රියාත්මක කරන්නේ එකී ග්‍රහයන් තිදෙනාය. බුදු දහමේ හරය වන්නේ හේතුව නැති කිරීමෙන් ඵලය නැතිවේ යන්නය. එනිසා එවැනි රෝගීන් සිතුවිලි වචන හා ක්‍රියා පව් නූපදින ලෙස හසුරුවාගත යුතුය. ඊට කළ යුත්තේ පන්සිල් පද පහ රැක ගැනීම විනා අන් යමක්‌ නොවේ.

පව් ඉපදීම වැඩි වන විට පව් නිසා උපන් ඵලයවූ රෝගයද තවතවත් බලවත් වේ. එනිසා පවෙන් වැළකීම ප්‍රථම කාර්ය වේ. දෙවනුව පව නියෝජනය කරන ආධ්‍යාත්ම බලවේගවූ සඳු, කුජ, ශනි යන විශ්ව ශක්‌ති මෙල්ල කළ හැකි සෙච්තනික ශක්‌තිවල පිහිට පැතිය යුතුය. එනම් සඳු ග්‍රහයා වෙනුවෙන් මහා බ්‍රහ්මයාටද කුජ ග්‍රහයා වෙනුවෙන් කතරගම දෙවියන්ටද සෙනසුරු වෙනුවෙන් විශ්ණු දෙවියන්ටද පුද පූජා තබා සෙත්කවි ආදියද කියවා සුබ දිනක සුබ හෝරාවකින් ඖෂධ ප්‍රතිකාර ගැනීමය. එවිට දීර්ඝ කාලයක්‌ නිරෝගී බව ඇති කර ගත හැකිය.

පවක්‌ දුරුකිරීම ලේසි නැත. දුරුකළ හැක්‌කේ සමත, විදර්ශනා වඩමින් බණ භාවනාදී ක්‍රියාවන්වල නියෑළී සම්මුති ධර්ම විනිවිද පරමාර්ථ ධර්ම අවබෝධ කළ දිනකය. එබැවින් නැවත රෝගය කලකට පසු පැමිණිය හැක. ධර්මානුකූල පැවැත්මක සිට යළිත් ඉහත කී පරිදි කටයුතු කර දෙවැනි වතාවටත් රෝගය ජයගත හැක. මේ රෝග පිළිබඳ සාමාන්‍ය විවරණයකි. අප උදාහරණ කළේ මිථුන ලග්නයයි. සෙසු ලග්නවල ක්‍රමයද මෙසේමය. අංශබාග, පිළිකා වැනි රෝග පිළිබඳ මතු දිනක උගනිමු. මෙහි සපයා ඇත්තේ ලෙඩ රෝගවලට මූලික වන ග්‍රහ බලය හඳුනාදීමකි.

We found this article from Divaina on 2013/09/22.

.