ලෝභයෙක්‌ බිහිකරන ග්‍රහ බලය

259
ලෝභයෙක්‌

ලෝභයා අමුතුම චරිතයකි. මෙසේ ලෝභයෙක්‌ බිහිවීමට බලපාන ග්‍රහ බලය මෙන්ම මිනිසකුගේ ලෝභකම පිළිබඳ ඔහුට අත්වන ආදීනව කුමක්‌ද යන්න මේ ලිපියෙන් ගෙන එන්නට බලාපොරොත්තු වෙමි. මේෂයේ පටන් මීනය දක්‌වාවූ රාශි චක්‍රයේ පවතින රාශි අතරින් මකර රාශිය තරම් ආත්මාර්ථකාමි ලෝභ ගති දනවන රාශියක්‌ තවත් නැති තරම්ය.

එසේම මේෂ – වෘෂභ යන රාශි දෙකෙන්ද ලෝභ ගති විකාශනය කරන නමුත් මකර රාශිය තරම් ප්‍රබල නොවේ. මෙම රාශිවල සැඟවී පවතින ලෝභය හෙවත් තෘෂ්ණාව බලවත් ලෙස විකාශනය වන්නේ රවි-චන්ද්‍ර-බුධ-ශනි-ගුරු වැනි ග්‍රහයන් යෝගවීම අනුවය. ගුරු ග්‍රහයා විශේෂයෙන් මකර රාශිය තුළ නීච භාවයට පත්වේ. එහෙත් ඔහු උච්ච වන අංශකය තුළ සිටීනම් යහපත් වේ. බුධ-ශනි-සඳු-රවි තරම්ම ගුරුගෙන් තෘෂ්ණාව තදබල ලෙස විකාශනය නොවේ.

ජන්මියෙකුගේ සිත තදබල තෘෂ්ණාවන්ට ලක්‌ කිරීම මෙම රාශි හා ග්‍රහ සම්බන්ධය බලපායි. තෘෂ්ණාව යනු සෑම අයෙකු තුළම පවතින සාමාන්‍ය ලෞකික තත්ත්වයකි. එම තත්ත්වය ප්‍රමාණය ඉක්‌මවා ගිය මිනිසුන් සමාජය තුළ බෙහෙවින් සිටී. එවන් අයගේ කේන්ද්‍ර තුළ සෙනසුරු මකර රාශි ගත වීම හෝ එහි චන්ද්‍රයා සිටීම, නැතිනම් රවි-බුධ වැනි ග්‍රහයෙක්‌ යෝගවී සිටීම දැකිය හැක.

ලෝභයෙක්‌

රාශි හා ග්‍රහ සම්බන්ධය

සෙනසුරුට මකර රාශිය තමන්ගේම රාශියකි. ඔහු එහි යෝගවී සිටීනම් තදබල ආත්මාර්ථකාමියෙක්‌ බිහි කරයි. තෘෂ්ණාවෙන් පිරීගිය මනසක්‌ බවට පත්වෙයි. ඕනෑම දෙයක්‌ තමන්ගේම වාසිය පිනිසම හරවාගැනීමට දක්‍ෂය. යම් දෙයකට ආශා කිරීම හෝ තම වාසිය පිනිස නඩු හබ ආදියටද නොපැකිලිවම උනන්දු වෙයි. දෙමාපියන්ගෙන් ලැබිය යුතු දේපළ පවා අන් අයටත් නොදී තමන්ම හිමිකර ගන්නට පවා උත්සාහ කරයි.

බුධ ග්‍රහයාද සෙනසුරු සමඟ මකරයේ හෝ බුධ තනිව හෝ වෘශ්චික – වෘෂභ වැනි රාශියක හෝ සිටීනම් තත්ත්වය තවත් තද බල වෙයි. එවැනි අය යම් දේකට ආශාවක්‌ ඇතිකර ගතහොත් එය තද වතුර පිපාසයක්‌ සැදුනා වගේ දෙයකි. තද වතුර පිපාසයක්‌ සෑදුන කෙනෙක්‌ සියලු වැඩ අත්හැර පිපාසය සංසිදුවා ගන්නට උත්සාහ කරන්නාක්‌ මෙන් එම පුද්ගලයාද ඒ මත්තේම ගමන් කරයි.

සෙනසුරු හා ගුරු මකර රාශියේ වීනම් මිල මුදල් වස්‌තු ඉඩකඩම් පිළිබඳව නොසන්සිඳෙන ආශාවන්ගෙන් පිරුණු ලෝභයෙක්‌ බිහි කරයි. එවන් අය අන්අයගේ දුක ගැන හෝ මිනිස්‌කම ගැන හෝ නොසිතන තරමට අන්ධවෙයි. කොපමණ මුදල් වස්‌තුව තිබුණත් ඒවා තව තවත් වර්ධනය කරගන්නටම සිතනවා මිස සෑහීමකට පත් නොවේ.

ලෝභයෙක්‌

කුජ-බුධ-ශුක්‍ර සංයෝගය

කුජ-බුධ-ශුක්‍ර සංයෝගය මකර රාශියේ වී නම් එම තැනැත්තා හෝ තැනැත්තිය කාමය කෙරෙහි අධික ආශාවන්ගෙන් පෙළෙයි. එම තෘෂ්ණාව කොබඳුද කිවහොත් අන් පුරුෂයෙකුගේ බිරිඳකට හෝ අන් බිරියකගේ සැමියකුට හෝ සිත ගියහොත් මහා අනතුරුදායක තත්ත්වයක්‌ම ඔවුන්ගෙන් සිදුවෙයි. කෙසේ හෝ එම අවශ්‍යතාව සපුරාගන්නට දරන උත්සාහය අත් නොහරී. එනිසා තම අවධානයට ලක්‌වූ අන් සැමියා හෝ බිරිඳ අනවශ්‍ය කරදර රැසකට මුහුණ දෙන්නා සේම තමන්ද දැඩි කරදර වලට ලක්‌වේ. එහෙත් එය තමන්ට නොදැනේ.

අනෙකාගේ විවාහ දිවියට පවා කරදර බාධක මතුවීම සහකරු හෝ සහකාරියගේ සැකයට භාජනය වීම නැති කරදර ඇතිවී දුකට භාජන වීම සිදුවෙයි. එසේම තමන්ටත් නින්දා අපහාස ඇතිවීම පමණක්‌ නොව ශාරීරික පීඩාවලටද භාජන වීමට සිදු වෙයි. තිස්‌ හතළිස්‌ ගණන් වයස්‌ ගතවුවද ඉතාම ලාබාල දැරිවියන් දූෂණය කිරීම, දූෂණය කොට මරා දැමීම වැනි භයානක දේවල් කරන්නේද එවැනි අයයි.

මකර – මේෂ – වෘෂභ සංයෝගය

මකර – මේෂ – වෘෂභ වැනි රාශිවල ඉහත කී ග්‍රහයන් තැප්පත් වීම තුළින් එවැනි මිනිසුන් බිහිවේ. බුදු දහමට අනුව ලෝභය හෙවත් දැඩි ආශාව තද පිපාසයකට උපමා කර තිබේ. දැඩිලෙස පිපාසය දැනෙන තැනැත්තා සියලු වැඩ නවතා බීමට වතුර සොයා යන්නේය. වතුර නොලැබීම සෑම ක්‍රියාවක්‌ම ඇන හිටීම මෙන්ම මරණය පවා සිදුවීමට බලපාන්නකි. ලෝබකම හෙවත් අධික තෘෂ්ණාවද එලෙසමය.

ලෝභයෙක්‌

බුදු දහමට අනුව ලෝභය හෙවත් තෘෂ්ණාව සත්වයා තවන දවන අපා දුකකි. ලෝභය පවත්වන දෙය කෙරෙහි හටගන්නා ආස්‌වාදයත් සිතෙහි පවතින බැවින් ඒ තැවීම – දැවීම තමන්හට නොතේරෙයි. එසේ තෘෂ්ණාවෙන් දුක්‌විඳ යමක්‌ හිමිකර ගත්තත් එය කෙටිකලකින්ම අනිත්‍ය වී (එකාකාරී වී) එහි ආස්‌වාදය දුර්වල වන්නේය. එවිට යළි දුක්‌ දැනේ. වර්තමාන සමාජය දෙස බලන විට පෙම් සබඳතා පවත්වා විවාහ වී කෙටි කලකදී අසාර්ථක වුණ ජීවිත උදාහරණ වේ.

එසේම තෘෂ්ණා බලවත් වී විකෘති තත්ත්වයට පත්ව ඒවා ඉෂ්ඨකරගත් පසු භයානක කරදර මෙන්ම මරණයට පවා පත්වීම සිදුවන අවස්‌ථා තිබේ. කාම තණ්‌හාවෙන් වියරු වැටී කාම අපරාධ කර නීතියට කොටුවී මෙලොව දීම ඵලදෙන විපාක වේ. විශේෂයෙන් ලාබාල දැරිවියන් දූෂණය කර මරා දමන කාමාතුර තෘෂ්ණා ඇත්තන් එවැනි තත්ත්වයන්ට පත්වේ.

තදබල ලෝභයෙක්‌ බිහිකරන ග්‍රහ සංයෝගය

විශේෂයෙන් මකර රාශියෙහි ශනි බුධ හෝ සඳු බුධ දෙදෙනා සංයෝග වී සිටීම තරම් තදබල ලෝභයෙක්‌ බිහිකරන තවත් ග්‍රහ සංයෝගයක්‌ නැති තරම්ය. විශේෂයෙන් එවන් පුද්ගලයන්ගේ උගත් නූගත් භාවයද එයට බලපායි. සිය ගණනක්‌ පාවිච්චි කරන ළිඳක්‌ වසා දමා ඒ පර්චස්‌ එකක්‌ පමණ බිම් කඩකට ලෝභකම් කරන තදබල ලෝභයෙක්‌ කරන්නට තරම් විකෘති වූ භයානක මානසික තත්ත්වයන් එවැනි ග්‍රහ සංයෝගයකට බිහිකළ හැකිය.

ළිං කපා දීම අටමහා කුසලයක්‌ බව බුදු දහමේ දැක්‌වේ. එසේනම් එවැන්නක්‌ කිරීම – බොන වතුර අවහිර කිරීම තදබල පාපයකි. එවැනි තැනට පත්වන තෘෂ්ණාව නිසා මෙලොව දීම විපාක වලට මුහුණ දෙන තත්ත්වයන්ද බුදු දහමේ දැක්‌වෙයි. හෘදය වස්‌තුවේ පවත්නා ලේ තුළ මනෝ විඤ්ඤාණ ධාතුව පවතින බවත් අධික තෘෂ්ණාව තැම්පත් වන්නේ ඒ තුළ බවත්, සිරුර පුරා ගමන් කරන ලේ තුළ මේ තෘෂ්ණාධි කෙලෙස්‌ තැන්පත් වන අයුරුත් දහම තුළ දැක්‌වෙයි.

ලෝභයෙක්‌

හෘදය රෝග, පිළිකා රෝග, අංශ භාග, අතීසාරය වැනි භයානක රෝග ආරම්භවීමට අධික තෘෂ්ණාව මුල්වන බව පෙන්වා තිබේ. එපමණක්‌ නොව සාමාන්‍ය වශයෙන් සිරුරක තිබිය යුතු නිරෝගි බව බිඳ වැටීම මෙමගින් සිදුවේ. (ත්‍රිපිටකය ඇසුරෙන් රේරුකාණේ චන්ද විමල හිමි ලියූ චිත්තෝපක්‌ලේෂ නම් පොත කියවන්න).

එනිසා මකර රාශි ගතව විශේෂයෙන් ශනි – බුධ වැනි ග්‍රහයන් පිහිටා තිබීමෙන් මිනිසකුගේ අධික තෘෂ්ණාව පමණක්‌ නොව ශරීර සෞඛ්‍ය පිළිබඳවද කරුණු දැනගත හැකිය. එය ලග්නාධිපති හා 06 වැන්න අධිපතිගේ තත්ත්වයන් අනුව තීරණය කළ යුතුය. ලෝභ කමේ අවසාන ඵලය වන්නේ මරණින් මතු අපාගත වීමය. දුර්ගන්ධය – අසූචි – අන්ධකාරය හිමිකර ගැනීමය. එනිසා සැබෑ ලෙස දහම අවබෝධ කරගැනීම ග්‍රහබල පරදා ජයග්‍රහණය ලැබීමේ එකම මාවත වෙයි.

We found this article from Divaina on 2013/10/20.