ඔබේ අත් අකුරු කියයි ඔබ ගැන

1097
අත් අකුරු
අත් අකුරු

එක හා සමාන ලෙස අත් අකුරු බොහෝ විට දක්‌නට ලැබුණත් එසේ වන්නේ බාහිර පෙනුමෙන් පමණි. එවැනි ලිපි දෙකක්‌ පරීක්‍ෂා කිරීමේදී අකුරේ රේඛා විහිදයන ආකාරයෙන්, අකුරු ලියන හැඩයෙන් කොම්බුව, ගැටය ආදිය ඉස්‌පිල්ල, පාපිල්ල, අකුරට සම්බන්ධකරන ස්‌ථානය හා ස්‌වරූපය ලියන ශෛලියේ එකකට එකක්‌ වෙනස්‌කම් තිබෙන බව පැහැදිලිය. මේ වෙනස්‌කම් ඇතිවන ක්‍රියාකාරිත්වය, ස්‌වභාවය තේරුම් ගැනීමෙන්, අකුර සමානවුවත් ඔවුන්ගේ ක්‍රියාකාරකම්වල වෙනස්‌කම් ඇති බව හඳුනාගත හැක.

ලිවීමට තෝරාගත් කඩදාසියේ දෙපස තීරු ඉහළ සිට පහළට සමාන්තරව වෙන් වෙන්කොට තිබේද, අකුරුවල ශෛලිය හා හැඩය පැහැදිලි වේද, එය ආයාසයෙන් තොරව ලියන ලද්දේවේද, එසේ නම් එම තැනැත්තා ක්‍රමානුකූල හැඩ ගැස්‌මක්‌ ඇති මනාව තුළනය වූ මනසකින් යුක්‌ත අයෙකු බව නිගමනය කෙරේ. වම් පස තීරුව වඩා පළල්ව පවතීනම් බිය, අප්‍රවේසම වැනි චරිත ලක්‍ෂණද, වඩා පටු නම් ලෝභකම, අරපිරිමැස්‌ම, විපරම් සහිත බව යනාදී ස්‌වභාවයන්ද පවතී. එමෙන්ම ඉහළ සිට පහළට ඇති දෙපස තීරුවල ඉහළත් පහළත් අතර ඇති පරතරය බොහෝ සෙයින් අඩු හෝ වැඩි නම් ඔහු ප්‍රශ්න හමුවේ නොබියව ඉදිරියට යන කෙනෙක්‌ද පසුබාන කෙනෙක්‌ද යන්න නිගමනය කෙරෙයි. දකුණු පස තීරුව වඩා පළල්ව දැක්‌කේනම් අනාගතය කෙරෙහි බියක්‌ පවතින බව පැහැදිලි වෙයි.

ප්‍රමාණයට වඩා ලොකු, අක්‍රමවත් අකුරු මානසික දුර්වලතාවකින් යුත් මනසක ලක්‍ෂණයකි. කුමන ආකාරයේ දුර්වලතාවක්‌ද යන්න නිගමනය කළ හැක්‌කේ අකුරුවල ස්‌වභාවය අනුවය. වචන එකට බැඳී පවතී නම් බොහෝවිට වංචාකාරී බව පෙන්නුම් කරන්නකි. කෝණාකාර ලෙස අත් අකුරු ලියන්නේ හොඳ ආත්ම ශක්‌තියක්‌ ඇති පුද්ගලයෝය.

අත් අකුරු

අවංක, සෘජු වැරදි නියම ආකාරයෙන් අවබෝධ කරගත් තැනැත්තා සිරස්‌ව, තනි පේලියට අකුරු ලියාගෙන යයි. නමුත් ඔහු සිතිවිලිවලට තරමක්‌ වහල්ය. තිරස්‌ව පේලියකට අකුරු ලියාගෙන යනවිට යම් යම් අකුරු උඩ අතට ගමන් කරයි නම් එවැනි අය නිතරම අන්අය අතරින් කැපී පෙනීමට උත්සාහ දරන අය වෙති. එසේ අකුරු ලියාගෙන යනවිට යම් යම් අකුරු පහළට ගමන්කරයි නම් එවැනි අය නිතරම රෝගපීඩාවලින් පෙළෙන නිතරම යම් විශේෂ දෙයක්‌ බලාපොරොත්තුව සිටින අයයි.

අත් අකුරු වල ප්‍රමාණ සහ හැඩය

එක්‌ එක්‌ අකුරුවල ප්‍රමාණ සහ හැඩය වෙනස්‌වෙයි නම් ඔහු ස්‌ථිරසාර ප්‍රතිපත්තියක්‌ නැති පුද්ගලයකු බව තේරුම් ගන්න. ඔහු විටින් විට අදහස්‌ හා ගතිගුණ වෙනස්‌ කරන්නෙකි.

රවුම් වටකුරු අත් අකුරු , කාරුණික අනුකම්පාසහගත අයෙකුගේ අතින් ලියවේ. අසරණ අයට පිහිටවීම, අන් අයගේ සිත් දිනාගෙන කටයුතු කිරීමට එවැන්නෝ ප්‍රියතාවක්‌ දක්‌වති.

ප්‍රමාණයෙන් ලොකු අක්‍රමවත් අකුරු වයස අවු. 3-5 අතර ළමයින්ගේය. තද ගැඹුරු රේඛාවලින් යුක්‌තනම් අඩු මානසික මට්‌ටමක්‌ පෙන්නුම් කෙරේ. ලිවීමේදී ගන්නා හය, කොම්බුව, ඇදය, ඉස්‌පිලි, පාපිලි යොදා ගන්නා ආකාරය අනුව පුද්ගලයාගේ මානසික පීඩනයත් උද්ගත වේ. එසේම ලිවීමේදී භාවිතවන උපකරණවල අඩුපාඩු හා දුර්වලකම් කියාපායි. ඉස්‌පිල්ල, පාපිල්ල අකුරට ආසන්නව කුඩාවට යයි නම් ප්‍රකාශන ශක්‌තියේ දුර්වලතාව පෙන්නුම් කරයි.

අත් අකුරු

අකුරුවල ඇලකිරීමේ ස්‌වභාවය අනුව ඔහුගේ හෝ ඇයගේ විවෘත හෝ සංවෘත භාවය සමාජය සමඟ හැසිරෙන ආකාරය අනාගතය හැඩ ගැසෙන ආකාරය, චිත්ත වේග බලපවත්වන ආකාරය තේරුම් ගත හැකිය, ශරීරික හා මානසික වර්ධනයන්ද, නිරවුල් බවක්‌ද ඇති අයගේ අකුරුවල වෙනස්‌කම් ඇතිවන්නේ ඉතා සෙමින්ය. ස්‌ත්‍රීන්ගේ අකුරුවලත් පිරිමින්ගේ අකුරුවලත් හැඩය හා ලිවීමේ ස්‌වභාවයන්හි වෙනස්‌කම් පවතී. හඳුනා ගැනීමට අපහසුතරම් සමානකම් නැත්තේද නොවේ. උත්සාහයෙන් විවිධ වෘත්තීන්හි නියෑළී ලෞකික දියුණුව කෙරෙහි සිත් යොමුකරන ස්‌ත්‍රීන්ගේ අත් අකුරු බොහෝ දුරට පිරිමින්ගේ අකුරු හා සමාන ලක්‍ෂණ පෙන්නුම් කරයි.

ඉතා කුඩාම ප්‍රමාණයට අත් අකුරු ලියන්නා ලඡ්ජාශීලී අයෙකු වන අතර එම අකුරු පසු පසට ඇලවුන ස්‌වාභාවයක්‌ ගනීනම් හේ වඩාත් ලැඡ්ජාශීලී බවක්‌ පෙන්නුම් කරයි. සාමාන්‍ය ප්‍රමාණයට කුඩාවට අත් අකුරු ලියන්නේ නිතර නිතර පර්යේෂණාත්මක සිතිවිලි පහළවන පුද්ගලයෝය. ඉතා පිරිසිදුව සාමාන්‍ය ප්‍රමාණයට චාම් ලෙස ලියන අත් අකුරු උසස්‌ ගතිගුණ ඇති පුද්ගලයන් අතින් ලියවේ.

We found this article from Divaina on 2013/09/29.