ධන සම්පත් සහ බාධක හෙළි කරන දෛව රේඛාව

229
දෛව රේඛාව
දෛව රේඛාව

අත්ලේ මුල වූ මැණික්‌ කටුව ප්‍රදේශයෙන් ආරම්භ වන ශනි රේඛාව හෙවත් දෛව රේඛාව අත්ලේ මැද කුජතලාව හරහා මැදඟිල්ල දෙසට විහිදයයි. මෙය ශනි මණ්‌ඩලයෙන් අවසන් වන නිසා ශනි රේඛාව යනුවෙනුන්, ධනය ගැන කියෑවෙන බැවින් ධන රේඛාව යනුවෙනුත් දෛව රේඛාව හඳුන්වයි. මෙම රේඛාවේ ආරම්භය අල්ලේ මුලින් පමණක්‌ නොව චන්ද්‍ර මණ්‌ඩලය, ජීවන රේබාවට ආසන්නව මැණික්‌ කටුව ප්‍රදේශයෙන් හෝ සිකුරු මණ්‌ඩලයෙන් හෝ විය හැක. කුමන ස්‌ථානයකින් පටන් ගත්තත් මෙම රේඛාව සෘජුව විහිද යන අතර ඒ මගින් පුද්ගලයාගේ දෛවය පිළිබඳ ශුභාශුභ, ධන සම්පත්, දියුණුව බාධක ආදී බොහෝ දේවල් මෙම රේඛාවේ පිහිටීම අනුව හෙළදරව් කර ගත හැකිය. කිසියම් රේඛාවක්‌ ආරම්භ වන ස්‌ථානයත් එය අවසන් වන ස්‌ථානයත් අනුව ශුභ අශුභ වෙනස්‌ වීම හස්‌ත රේඛා විද්‍යාවේ සිද්ධාන්තයක්‌ වෙයි. ඒ අනුව දෛව රේඛාව පටන් ගැන්මත් අවසානයත් අනුව ගෙන දෙන පලාඵල එකින් එකට වෙනස්‌ ස්‌වභාවයක්‌ ගනියි.

දෛව රේඛාව පටන් ගැන්ම හා අවසානය

මැණික්‌කටුව ප්‍රදේශයෙන් ආරම්භ වී සෘජු රේඛාවක්‌ වශයෙන් ශනි මණ්‌ඩලය තෙක්‌ දෛව රේඛාව විහිදයාම වඩාත්ම සුභඵල ගෙන දෙන පිහිටීමක්‌ වෙයි. අනේක විධ, භව බෝග සම්පත්, ධන සම්පත්, ලැබීමට එය හේතුවක්‌ වේ. එමෙන්ම එය මැණික්‌ කටුව ප්‍රදේශයෙන් ආරම්භ වී රවි මණ්‌ඩලයට විහිදී ගියේ නම් නොයෙකුත් කලා ශිල්පවලින් ප්‍රසිද්ධ වන අයෙකු හඳුනා ගත හැකිය. එමෙන්ම එම රේඛාව බුධ මණ්‌ඩලයට (සුලඟිල්ල මුල) විහිදයා නම් එමගින් සුප්‍රසිද්ධ ව්‍යාපාරිකයෙක්‌ පෙන්නුම් කරයි. දෛව රේඛාවෙන් මතුවන ශාඛාවක්‌ රවි මණ්‌ඩලයට විහිද යාම ලොතරැයි දිනුම් වැනි හදිසි ධන ලාභ හිමිවීමට හේතුවක්‌ වෙයි. නොයෙකුත් බාධක මධ්‍යයේ තමන්ගේම උත්සාහයෙන් උසස්‌ තත්ත්වයට පත්වෙන අයගේ දෛව රේඛාව ආරම්භ වන්නේ බොහෝ විට ජීවන රේඛාව ආශ්‍රයෙන්ම අයෝමය ආත්ම ශක්‌තිය හා නොපසුබස්‌නා වීර්යය ඔවුන්ගේ චරිතයේ කැපී පෙනෙන ලක්‍ෂණයක්‌ද වේ.

දෛව රේඛාව

චන්ද්‍ර මණ්‌ඩලයෙන් ආරම්භ වී දෛව රේඛාව ශනි මණ්‌ඩලය දෙසට විහිදේ නම් එම ස්‌ත්‍රිය හෝ පුරුෂයා විවාහයෙන් පසු විරුද්ධ ලිංගිකයාගේ උදව්වෙන් දියුණුවට පත්වේ. ඉක්‌මන් විවාහයක්‌ද එමගින් පෙන්නුම් කෙරේ. එමෙන්ම එම අය ඕනෑම ප්‍රශ්නයකදී නොසැලී නොබියව මුහුණ දෙන කෙනෙක්‌ විය යුතුය. එවැන්නන්ට වාසනාවන්ත යුග දිවියක්‌ ගත කිරීමේ භාග්‍යය උදාවෙයි. මෙම රේඛාව කුජ තලාවෙන් (අත්ලේමැද) පටන්ගෙන රවිමණ්‌ඩලයටත් බුධ මණ්‌ඩලයටත් වැටීමත් ධනවතෙකු වීමට හේතු වේ.

අවාසනාවන්ත පිහිටීම්

ගුරු මණ්‌ඩලය දෙසට විහිද ගිය රේඛාවෙන් ගරු නම්බු ලැබීමට අසීමිත ආශාවෙන් සිටින අයෙක්‌ හඳුනාගත හැක. මෙම රේඛාව චන්ද්‍ර මණ්‌ඩලය තුළ ගැඹුරුව පිහිටියේ නම් සමාජයේ ප්‍රසිද්ධියට පත්වේ. එමෙන්ම එම රේඛාව හෘදය රේඛාවෙන් අවසන් වේ නම් හෘදය ආශ්‍රිත රෝග හා ආදර සම්බන්ධතා බිඳ වැටීමටත් හේතු විය හැක. රැකියා අහිමි වීමටත් හේතුවක්‌ විය හැක. සමහරවිට හොඳ දෛව රේඛාවක්‌ තිබියදීත් පුද්ගලයින් අවාසනාවන්ත වන අවස්‌ථාද ඇත. එයට හේතු වන්නේ සමතුලිත නොවූ අතක්‌ තිබීමය. ඒ සඳහා මණ්‌ඩලවල හොඳ පිහිටීමක්‌ද තිබිය යුතුය. දෛවය රේඛාව ශීර්ෂ රේඛාවෙන් ආරම්භ වී ඇත්තේ නම් එම අයගේ දියුණුව ලබන්නේ මැදිවයස පසුවීමෙන් පසුවය. ශනි මණ්‌ඩලය පසුකර මැද ඇඟිල්ලේ පළමු පුරුක දක්‌වා දිවයන දෛවය රේඛාව මහා අවාසනාවන්ත පිහිටීමක්‌ වෙයි. මහ මගට වැටෙන යාචකයින්ගේ අත්වල එවැනි පිsහිටීම දැකිය හැකිවේ.

කැඩුම්, බිඳුම් නොමැති මනාව පිහිටි දෛව රේඛාවක්‌ ගැහැනියකගේ අතේ පිහිටියේ නම් එය සැබෑම වාසනාවකි. පෙර භවයන්හි කරන ලද නොමද පින්බල ඇති ඇය සුපින්වත් පුරුෂයෙකුට භාර්යාව වීමේ භාග්‍යය ලබන්නීය. සමහර අයගේ අත්වල දෛවරේඛාව නොමැති වීමටද පුළුවන. එවැනි අයට දියුණුවක්‌ ළඟා කරගැනීමට මහත් වෙහෙසක්‌ දැරිය යුතු වෙයි. දෛව රේඛාව නොමැති වුවත් බොහෝ විට ජය ලබා ඇත. දෛවරේඛාව නොමැති වුවද අත්ලේ ඇති අනෙක්‌ ශුභ අශුභ ලක්‍ෂණ නිරීක්‍ෂණය කිරීමෙන් අනාගතය පැහැදිලි කර ගත හැක. අත්ල මුලින් පටන්ගත් දෛව රේඛාව ශීර්ෂ රේඛාව ස්‌පර්ෂ කිරීමට පළමු කුජ තලාවේදී නැවතුන හොත් එම කාල සීමාවේදී ඇති වූ බාධාවක්‌ හේතුවෙන් දියුණුවට බාධා හා ජීවනෝපාය මාර්ගවලට හානි සිදු වී ඇති බව පෙන්නුම් කරයි.

දෛව රේඛාව

භගිනි රේඛාව

දෛව රේඛාවට සරල සමාන්තරව භගිනි රේඛාවක්‌ පැහැදිලි ලෙස විහිද ගියහොත් මාර්ග දෙකකින් ආදායම් ලැබීමට හේතු වෙයි. නොයෙක්‌විට දෛවරේඛාව පළුදු වන්නේ අල්ල මුලින් හෙවත් රේඛාව පටන් ගන්න ස්‌ථානයට නුදුරුව හෝ ශීර්ෂ රේඛාවට පහල හෝ ශීර්ෂ රේඛාවටත්, හෘදය රේඛාවටත් අතරදී විය හැකිය. අත්ලමුලදී කැඩීම් බිඳීම්, දූපත් ආදී ලකුණු වී නම් එම කොටස ළමා කාලය හා සම්බන්ධ සීමාවේ වෙයි. ජීවිතයේ එම කාල සීමාව දුක්‌ සහිත වේ. එම කොටසේදී දෛවරේඛාව ගැඹුරුව ප්‍රබලව තිබුණි නම් එම කරදර අවම වෙයි.

රේඛාවේ මුල කොටස දුබලව තිබුණි නම් මව්පියන් යටතේ ගත කළ ජීවිතය දුක්‌ සහිත වේ. දිළිඳුකම එයට හේතු විය හැකිය. දුක අවසන් වීමෙන් පසුව ස්‌වඋත්සාහයෙන් දියුණුව ළඟා කරගනී. දෛවරේඛා කැඩීම් බිඳීම් ජීවන රටාවේ විවිධ විපර්යාසයන්ද පෙන්නුම් කරයි. රැකියා අහිමි වී වස්‌තු භංගත්වය ආදී අවාසනාවන්ත සිදුවීම් එමගින් ප්‍රකට වේ. දෛවරේඛාවේ මතු වී පහලට විහිදෙන (අවරෝහණරේඛා) අනේක විධ බාධා මෙන්ම බලාපොරොත්තු සුන්වීම් ආදිය අනාවරණය වෙයි. අන් අයගේ ආධාර හා මගපෙන්වීම් මගින් උසස්‌ දියුණුවක්‌ ලබන අයගේ අත්වල ඇති රේඛා ලක්‍ෂණයක්‌ තමයි දෙකට බෙදී ආරම්භවෙන දෛව රේඛාව. දියුණුවීමට ඇති ආශාව එම රේඛාවේ අග ඇති තරු ලක්‍ෂණ පෙන්නුම් කරයි. දෛව රේඛාවේ අග කතිර ලකුණද අශුභයි. එමගින් හදිසි විපතක්‌ පෙන්වයි.

දෛවරේඛාව සිකුරු මණ්‌ඩලයෙන් පටන්ගෙන ශනි මණ්‌ඩලයට යොමු වීමත් සුභ පිහිටීමක්‌ වෙයි. 3 සෘජු ප්‍රතිපත්ති ඇති කාරුණික අයෙක්‌ එමගින් හඳුනා ගත හැක. තමන් පාලනය යටතේ පවත්වා ගෙන යන ව්‍යාපාර කටයුතුවලින් මේ අය විශාල දියුණුව ලබාගනී. එමෙන්ම සිකුරු මණ්‌ඩලයෙන් විහිදෙන දෛව රේඛාව ඇති අය කලාකාමී කටයුතුවලින් පෙන්නුම් කරන දක්‍ෂතා නිසා උසස්‌ දියුණුවක්‌ ලැබීමටද කලා ක්‍ෂේත්‍රයෙන් ප්‍රසිද්ධ වීමටද හේතුවේ.

We found this article from Divaina on 2014/01/12.