පොරොන්දම් වලටත් වඩා වැදගත් ග්‍රහ බලය

875
පොරොන්දම්
පොරොන්දම්

විවාහ දිවියට පා තබන යුවතිපතියන් පළමුව කරන්නේ පොරොන්දම් 20 ත් දස පොරොන්දම – අෂ්ඨකූටය යන කරුණු ගලපා ප්‍රතිඵල බැලීමය. ඒවායේ ප්‍රමාණාත්මක ලකුණු ප්‍රතිශතයක්‌ ලැබීම අනුව විවාහ තීන්දුව ගනී. විශේෂයෙන් දෙදෙනා උපන් නැකැත් පාදක කරගත් මෙකී පොරොන්දම් පරීක්‍ෂාව සිදුවෙයි. එසේම සුදර්ශන පරීක්‍ෂාවද ඇතැම් විට සිදුවන නමුත් එය නිවැරැදි ලෙස නොපැවැත්වෙන බවක්‌ පෙනේ.

විශේෂයෙන් ග්‍රහ බලය දෙදෙනාගේ ගොඩනැගී ඇති අන්දම එයින් අදහස්‌ කරන අතර ශාස්‌ත්‍රීය වශයෙන් එය ගැඹුරු පරික්‍ෂාවකි. එය දැඩි වගකීමකින් කළ යුත්තකි. විශේෂයෙන් මෙම පොරොන්දම් විවරණය වඩාත් නිවැරැදි වන්නේ ග්‍රහ බලය තුළිනි. එබැවින් යුග දිවියකට බලපාන ප්‍රධාන කරුණු කීපයක්‌ මේ ලිපියෙන් අණාවරණය කරමු.

ස්‌ත්‍රී දීර්ඝ පොරොන්දම

විවාහ දිවියක්‌ සඳහා බලපාන වැදගත් කරුණ වන්නේ ඔවුන්ගේ ලිංගික තත්ත්වයන්ගේ සමානුපාතික ස්‌වභාවයයි. වැඩිවශයෙන් මේ සම්බන්ධව අවධානය යොමු නොවන බවක්‌ පෙනේ. පොරොන්දම් 20 න් ස්‌ත්‍රී දීර්ඝ පොරොන්දම මේ තත්ත්වය පිළිබඳව දෙන සහතිකය වන්නේ ස්‌ත්‍රී උපන් නැකතේ සිට පුරුෂයා උපන් නැකත නැකැත් 14 කට එහා විය යුතු බවය. එහෙත් නක්‍ෂත්‍ර පොරොන්දමේ දී සුබවීමක්‌ නැතිනම් ස්‌ත්‍රී දීර්ඝ පොරොන්දමේදී නැකැත් 14 කට එහායින් පුරුෂයා උපන් නැකත තිබේ නම් අසුබ වෙයි. නමුත් පොරොන්දම් පරීක්‍ෂාවේදී එයට සුබලකුණු වැටේ. එය අසාර්ථකය.

එසේ වුවද දෙදෙනාගෙන් එක්‌ අයකුගේ විවාහ ස්‌ථාන අධිපති (7 වැන්න අධිපති) 06 වන භාවස්‌ථානයේ යෝගව සිටියොත් ඒ ගැන පරීක්‍ෂා කළ යුතුය. එම ග්‍රහයා අශුභ බලපෑම් වලින් තොරව එහි සිටියත් විවාහ ජීවිතයට තදබල අශුභතා එල්ල වෙයි. විශේෂයෙන් 06 වැන්න රෝග හා සතුරු ස්‌ථානය බැවින් ඒ දෙකම විවාහ දිවියට බලපෑම් ඇතිකළ හැක. විශේෂයෙන් ලිංගික බෙලහීනතා ඇතිවීම හෝ අසමානත්වය සිදුවන ඉඩකඩ එහි පවතී. එනිසා කෙටි කලකදී ඒ දෙදෙනා 06 වැනි භාවයෙන් ලබාදෙන සතුරු බවට පත්වීමටද ඉඩ තිබේ. එනිසා විවාහය බිඳීයැම, දික්‌කසාද වීම වැනි තත්ත්වයන්ට මූණ දීමටද සිදුවිය හැක.

පොරොන්දම්

මෙසේ තිබියදී පුරුෂ කේන්ද්‍රයේ සිකුරු සිටි තැනට ස්‌ත්‍රි කේන්ද්‍රයේ කුජ අශුභ දෘෂ්ටියක්‌ ලබාදී ඇතැයි සිතමු. මෙහිදී පුරුෂ කේන්ද්‍රයේ 07 අධිපති 06 වැන්නේ යෝගවී සිටී යයි සිතන්න. මේ අනුව ස්‌ත්‍රී කේන්ද්‍රයේ කුජ සතුරු ස්‌ථානයක සිට පුරුෂ කේන්ද්‍රයේ සිකුරුට පීඩාවක්‌ (දෘෂ්ඨියක්‌) ලැබීම සුදර්ශන පරීක්‍ෂාවෙන් බැලිය යුතුය. එසේ වූ විට ස්‌ත්‍රියගෙන් දක්‌වන්නේ අධික රාගාධික බවකි. නමුත් පුරුෂයා එයට අසමත් වේ.

ග්‍රහ බලයෙන් එසේ පවතිද්දී ස්‌ත්‍රී දීර්ඝ පොරොන්දම සුබවී ලකුණු වැටුණත් එය යථාර්ථය සැඟවී යැමකි. ඇත්තටම එවැනි තත්ත්වයක්‌ විවාහ දිවියට අත්කරන්නේ සම්පූර්ණයෙන්ම අසාර්ථකත්වයයි. විනාශයද එයින්ම සැලසේ. පොරොන්දමට ලකුණු වැටුණත් විවාහ දිවිය තුළ අර්බුද ඇතිවන්නේ මේ නොපෙනෙන තත්ත්වයන් තුළිනි.

එසේම 04 වැන්නේ රාහු යෝගවී සිටීනම් ඒ ගැනද විමසා බැලිය යුතුය. රාහු කුමන ග්‍රහයන්ගෙන් දෘෂ්ටි ලබා තිබේද? සුබ ග්‍රහ දෘෂ්ටි පවතීනම් යහපත්ය. 04 වැන්න අධිපති සිටින්නේ කුමන භාවයකද යන්නද විමසිය යුතුය. 04 අධිපති 06 වැනි භාවයේ සිටීනම් තත්ත්වය අසතුටු දායකය. රාහු හතර වැන්නේ සිට 4 අධිපති 06 යේ නම් ඇය හෝ ඔහු අමුතුම අදහස්‌ පවතින කෙනෙකි. ඒ අදහස්‌ නිසා හැම තැනකම අවුල් ඇතිකර ගනී. අඹු සැමි දෙදෙනා අතරද බරපතළ අර්බුද ඇතිවෙයි. මේවා ලග්න චන්ද්‍ර රාශ්‍යාධිපති පොරොන්දමෙන් විමසිය නොහැක.

සුදර්ශන පරීක්‍ෂාව

එක්‌ කේන්ද්‍රයක කුජ සිටි රාශියට සුදර්ශන පරීක්‍ෂාවේදී අනෙකාගේ කේන්ද්‍රයේ යුරේනස්‌ ග්‍රහයාගෙන් අශුභ දෘෂ්ටියක්‌ ලැබී ඇත්නම් එයද අඹු සැමි දෙදෙනා අතර හදිසි වෙනස්‌ වීම්වලට ලක්‌විය හැකිය. එසේම එක්‌ කේන්ද්‍රයක සෙනසුරු සිටි ස්‌ථානයට අනෙක්‌ කේන්ද්‍රයේ කුජ අසුබ දෘෂ්ඨියක්‌ ලබාදී ඇත්නම් ඔවුනොවුන් අතර කළකෝලාහල, වංචා ආදිය ඇති කරන පිහිටීමක්‌ වෙයි.

පොරොන්දම්

එසේම ලග්න චන්ද්‍ර රාශ්‍යාධිපති පොරොන්දම මෙන්ම නක්‍ෂත්‍ර පොරොන්දම අශුභ වීම අයහපත්ය. නමුත් කේන්ද්‍ර දෙකේ රවි-චන්ද්‍ර දෙදෙනා සිටින රාශි අධිපතියන් සුබ දෘෂ්ටි හෝ සුබ සං යෝග ඇතුව සිටින්නේනම් ඉතා යහපත් සම්බන්ධතාවක්‌ දෙදෙනා තුළ ඇතිකරයි. නමුත් නක්‍ෂත්‍ර හා ලග්න චන්ද්‍ර රාශ්‍යාධිපති පොරොන්දම අශුභ වීමෙන් ලකුණු කැපීයයි. එසේම සුදර්ශන පරීක්‍ෂාවේදී එක්‌කෙනකුගේ රවි අනෙකාගේ සඳු ලග්නයට පැමිණියේ නම් එයද දෙදෙනා අතර යහපත් සම්බන්ධතාවක්‌ ගොඩ නගන පිහිටීමකි.

දින පොරොන්දම

පොරොන්දම් 20 හි දින පොරොන්දම විශේෂයෙන් දෙදෙනා විවාහයෙන් පසු ලබන ආර්ථිකමය දියුණුව පිළිබඳ ප්‍රකාශ කරයි. ස්‌ත්‍රී උපන් දිනයේ සිට හයවැනි හෝ හත්වැනි දිනයේ පුරුෂයා ඉපිද සිටීනම් එය ඉතා අශුභ වෙයි. ඒ ධන භාවය දුර්වල වන බව කියෑවෙන බැවිනි. එහෙත් එක්‌ කේන්ද්‍රයක ලග්නාධිපති අනෙකාගේ 10 වැන්නේ යෝගවී ඇත්නම් එය රැකී රක්‍ෂා වෙළහෙළඳ කටයුතුවලින් දියුණුව ලබන පිහිටීමක්‌ වෙයි.

ඒ අනුව පොරොන්දම් ඒ ඒ කේන්ද්‍රවල ග්‍රහ බලය මත වෙනස්‌වී යන අන්දම දැකගත හැකිය. එනිසාම පොරොන්දම් ගැලපුණත් විවාහ බිඳී යන්නේ මේ තත්ත්වයන් මතය. මේ ආකාරයට බොහෝ කරුණු කාරණා ග්‍රහ පිහිටීම් තුළින් විමසිය යුතුය. දෙදෙනාගේ රවි ග්‍රහයන්ගේ පිහිටීම අනුව දෙදෙනාගේ පෞරුෂත්වය – පැවැත්ම ගැනද චන්ද්‍රයන් දෙදෙනාගේ පිහිටීම් අනුව දෙදෙනාගේ රුචි අරුචිකම්ද කුජ ග්‍රහයාගෙන් හා සිකුරුගෙන් ලිංගිකත්වය මෙන්ම රසාස්‌වාදයද බුද ග්‍රහයාගෙන් දෙදෙනාගේ හැඟීම් පිළිබඳවද විමසා බැලේ.

එසේම ගුරුගෙන් දෙදෙනාගේ ධාර්මික බවත් සෙනසුරුගෙන් දෙදෙනාට මුහුණ පෑමට සිදුවන කටුකත්වයන්ට සාර්ථක හෝ අසාර්ථකව මුහුණ දෙන අන්දමත් විකාශනය වෙයි. එපමණක්‌ නොව විවාහවී කෙටි කලකින් හදිසි අනතුරු, දරුණු ලෙඩ රෝග ආදියට මුහුණ දීමට සිදුවේද යන්න ග්‍රහ පිහිටීම්වලින් විමසා බැලිය යුතුය.

එනිසා විවාහ පරීක්‍ෂාවක පවතින බරපතළකම සෑම කෙනෙක්‌ම සිතට ගත යුතුය.

We found this article from Divaina on 2013/09/29.