යුග දිවියේ ගැටලු කේන්දරයෙන් දකිමු

160
යුග දිවියේ
යුග දිවියේ

පොරොන්දම් හොඳට ගැලපුණත් යුග දිවියේ ගැටලු ඇති වුණේ ඇයි කියන ප්‍රශ්නයට විසඳුම තියෙන්නේ කේන්ද්‍රයේ ග්‍රහයන්ගේ පිහිටීම අනුවයි. සමහර විට පොරොන්දම් ගැලපී තියෙන්නත් පුළුවන්. අත් අල්ලාගෙන මැයි ගස්‌ පෙළ අතරින් පියවර මනින්නත් ඇති. මල් වත්තේ සිසිල් සෙවණක ගසක්‌ යට වාඩිවී පෙම්බස්‌ දොඩන්නත් ඇති. එහෙමත් තියෙද්දි විවාහවෙලා ටික කලක්‌ ගතවෙන කොට දෙන්න දෙපැත්තකට බෙදිල වෙනස්‌වෙලා ගියේ ඇයි කියන ප්‍රශ්නය ඒ අයට පමණක්‌ නෙවෙයි, පවුල්වල ඥතීන්ටත් ඇසුරු කළ යාළු මිත්‍රයන්ටත් ඇති වෙනවා.

ඇතිවී වෙනස්‌ වෙමින් පැවතී නැතිවි යැම ලෝක ස්‌වභාවය කියල අපි ධර්මානුකූලව දන්නවා. ඒ නිසා හැමදේම අනිත්‍ය වෙනවා. ඒ තමයි සත්‍යය. නමුත් පෘථග්ජනයා මේ ලෞකිකත්වයේ පතුලටම එරිලා ඉන්න නිසා ඒවා තේරුම් ගන්න බැහැ. හැම දෙයක්‌ම මිනිසාගේ තෘෂ්ණාව මත පදනම්වූ දෘෂ්ඨ කෝණවලින් තමයි තීන්දු තීරණ අරගන්නේ. දැන් අපි මේ කරන්න යන්නේ ඒ වගේ යුගදිවිය අවුල් වූ කෙනකුගේ ජන්ම පත්‍රයක්‌ තුළින් එහෙම වීමට බලපෑ දෛවය අවබෝධ කිරීමටයි.

ඇගේ ලග්නය වූයේ කන්‍යා ලග්නයයි. ඇයගේ විවාහයව සම්බන්ධ ස්‌ථානය වන්නේ 07 වැනි භාවය වූ මීන රාශියයි. විවාහය සම්බන්ධයෙන් ක්‍රියාත්මක වන්නේ මීන රාශිය අධිපති ගුරු ග්‍රහයා ය. එම ග්‍රහයා මෙම කේන්ද්‍රයේ 08 වැනි භාවය තුළ සිටී. 08 වැන්න කේන්ද්‍රයක නරකම තැන්වලින් එකකි. විශේෂයෙන් 08 වැන්නෙන් ප්‍රකාශ වන්නේ මිනිස්‌ ජීවිතයට බලපාන බොහෝ අසුබතාවයන්ය. එවිට එහි කේන්ද්‍රයේ කුමන ස්‌ථානයක්‌ හිමි ග්‍රහයෙක්‌ එහි රැඳී සිටී නම් 08 වැන්නෙන් කියෑවෙන කරුණු අතරින් ඒ ග්‍රහයාට හිමි දේවල්වලට අසුබ බල පවත්වයි.

ඒ අනුව මෙම කේන්ද්‍රයේ විවාහය අධිපති ග්‍රහයා 08 වැනි භාව ගතවීමෙන් ඇතිවන සුබ ඵලය වන්නේ විවාහයෙන් දේපොළ ලැබීමය. ඉතිරි ලැබීම් වන්නේ මානසික වේදනා, පරාජය, දුක්‌ කම්කටොලු නරක ලෙස පිළිගැනීම කළහ. (අඬදබර), දෝෂාරෝපණ, අවමාන ආදී වූ තත්ත්වයන්ය. 07 අධිපති ගුරු ග්‍රහයා එම ස්‌ථානයේ සිටීමෙන් විවාහයට ඔහු උරුම කරන්නේද ඒ කරුණුය.

ඊළඟට විවාහ දිවියේ වැදගත්ම ස්‌ථානය වන්නේ කේන්ද්‍රයේ දෙවැනි භාවයයි. එහි ඇත්තේ දරු පවුල සම්බන්ධ බැඳීමය. එනිසා කුටුම්භ ස්‌ථානය ලෙසද එය හඳුන්වයි. එහි සිටින්නේ 05 සහ 06 අධිපති සෙනසුරුය. සෙනසුරුගේ ගතිය වන්නේ මිනිස්‌ දිවියේ හැම අතකටම අවහිර බාධක ප්‍රශ්න ඇතිකොට ජන්මියාට ඒ දිගේ දිව යන්නට සැලසීමය. මේ කේන්ද්‍රයේ 06 වැන්න ඔහුගේ මුල ත්‍රිකෝණ රාශිය බැවින් ඔහු කුටුම්බ ස්‌ථානය තුළට ගෙනෙන්නේ 06 වැන්නේ ගුණාංගයන්ය.

එහි ඇති ගුණාංග අතර පුද්ගලික සතුරන්, විරුද්ධකාරකම්, මිථ්‍යා විශ්වාස, මානසික අසහනය, දුක්‌වීම, බාධා අවහිර, නපුරු සිත් ස්‌වභාවය, අයුතු චෝදනා, වෛර කිරීම ආදී වූ ගුණාංග සමුහයකි. ඒ සියල්ල සෙනසුරු විසින් දෙවැන්න තුළ වපුරයි. එසේම මිනිසාගේ කතාව, කටහඬ ආදිය ද දෙවැන්නේ පවතී. එසේම 08 වැනි භාවය විවාහ ස්‌ථානය වූ 07 වැන්නේ දෙවැන්න නිසා අඹුසැමි ලිංගිකත්වයද එම 08 වැනි භාවයේ පවතී.

යුග දිවියේ

විශේෂයෙන්ම විවාහ ස්‌ථාන අධිපති ග්‍රහයා 08 වැනි භාවයේ සිටීමෙන් තමන්ට ලැබෙන කලත්‍රකාරයා ලිංගික වශයෙන් නොගැලපෙන තත්ත්වයක කෙනෙකි. විශේෂයෙන් මෙම කාන්තා කේන්ද්‍රයේ එම තත්ත්වය වැඩි වශයෙන් සොයා බලන විට විවාහ කාරක සිකුරුගේ තත්ත්වය බැලිය යුතුය. මෙහි රාහුට සංයෝග වූ සිකුරු 05 වන භාවයේ සිටී.

විශේෂයෙන් 05 වැනි භාවය දරුඵල පෙන්වන තැන මෙන්ම විද්‍යා ස්‌ථානයද වෙයි. ඒ පමණක්‌ නොව විවාහයට පෙරත් පසුත් පවත්වන ලිංගික සබඳතා මෙන්ම ආදරය, පරපුරුෂ හෝ පර ස්‌ත්‍රී සේවනයද 5 වැන්නේ පවතී. ඒ සියල්ලටම අධිපතිකම් කරන ග්‍රහයාද සිකුරුය. ඔහුට යෝග වී සිටින්නේද රාහුය. සිකුරු රාහුගේ මෝඩ ගතියත් වේගයටත් මැදිවෙයි. රාහු සිකුරුගේ ගති මුළුමනින් උරාගනී. බලවත් ග්‍රහයන්ට රාහුගේ අභියෝගවලට යටත් වන්ට සිදු වේ.

මේ නිසා ඇගේ ලිංගික තත්ත්වයන් දැඩිය. ශක්‌තිමත්ය. වේගවත්ය. විවාහ අධිපති 08 වැන්නේ සිටිමින් ඒ දැඩි බවට ශක්‌තියට වේගවත් බවට නොගැළපෙන දුර්වල ලිංගික ශක්‌තියක්‌ ඇති සැමියෙකු ලැබිණි. මිනිසාගේ තෘෂ්ණාවන් අතර කාම තෘෂ්ණාව ඉතා ප්‍රබලය. ඇයට සරිලන සේ එය නොමැතිවීම දැඩි මානසික පීඩාවක්‌ වෙයි. මේ පීඩාව දෙවැන්නේ සිටින සෙනසුරු තව තවත් අවුළුවයි. එනිසා කළහකාරී අඬදබර සංවාද කුටුම්බය හරහා ගලා යයි. මේ තත්ත්වය සැමියාට ඉවසිය නොහැක්‌කකි. ඔහු නීත්‍යනුකූල නොවීම ඇයගෙන් වෙන්විය.

යුග දිවියේ
A man proposing with a ring and flowers and a woman rejecting

මෙම කේන්ද්‍ර හිමියාග් නවාංශකය මේෂ රාශිය බැවින් 22 දෙර්කාණ අධිපති වූයේ සෙනසුරුය. විවාහ ස්‌ථාන අධිපති කුජය. කුජ සෙනසුරු හා බුධට යෝගව 09 වැනි භාවය තුළ සිටී. එම 9 වැනි භාවය මිථුන රාශියයි. එම රාශිය අධිපතියා බුධය. ඔහු එහිම සිටී. නමවැන්න අධිපති එහිම සිටීම ප්‍රබල පිං බලයකි. පෙර භවයන්හි දන්දීම් වැනි කුසලයන් සිදුකර ලබා ගන්නා ආයු, වර්ණ, සැප, බල, ප්‍රඥ යන ලෞකික පංච සමාපත්තිය මෙලොව ජීවිතයට මැනවින් ලබා දෙන්නේ ඔහුය. ඔහුට අයත් එම ස්‌ථානයේම සිටීම ඒ තත්ත්වයන් මනාව ලැබෙන පිහිටීමකි.

මෙම කේන්ද්‍රයේ එම ග්‍රහයා එම ස්‌ථානයේම සිටී. එනම් බුධ ග්‍රහයාය. එසේ නමුත් තමන් පෙර භවයක අනුන් රවටා ධනය උපයාගත් පවක්‌ද එයට සම්බන්ධව අකුසල උප පීඩක කර්මයක්‌ ලෙස ක්‍රියාත්මක විය. එය ක්‍රියාවට නංවන ග්‍රහයා වූයේ 22 වැනි දෙර්කාණ අධිපති වූ සෙනසුරුය. ඔහු 09 වැන්න වූ මිථුන රාශියේ දී ද්විත්ව ක්‍රියාකාරිත්වයක්‌ ගනී. ඒ අනුව පහත් වැඩවලට කේන්ද්‍ර හිමියා යොමුකොට පාඩු හා කරදර අත්කරයි. එසේම අනුන්ගෙන් තමා රැවටී ධන හානි හා කරදර ඇති කර ගනී.

මෙසේ සෙනසුරු මෙම ජන්මියා වංචනික විවාහයකට යොමුකොට පාඩු හා කරදර අත් කරවන පිණිස උපයෝගි කර ගත්තේ එම රාශිය තුළ ඔවුන් සමග යෝගවූ විවාහ ස්‌ථාන අධිපති වූ කුජ ග්‍රහයයා. මේ තත්ත්වය නිසා විවාහ වුවද විශාල ධනයක්‌ සමග විවාහයද අහිමිව පාඩු සිත් වේදනා මෙන්ම සමාජයට මුහුණ දෙන්නට පවා අපහසු ලඡ්ජාවන්ටද ලක්‌විය.

මේ අන්දමින් කෙනකුගේ දෛවය පිළිබඳව මූලික අධ්‍යයනයක්‌ කිරීමෙන් යමෙක්‌ ගොදුරු වන්නට යන විපතින් මුදා ගන්නට ජ්‍යෙතිෂඥයාට හැකියාව පවතී. එසේ වුවද එම කර්මය බලවත් නම් එය කෙසේ හෝ විපාක ලබාදීමට පෙළඹේ. ඇතැම් විට එවැනි තත්ත්වයන් ජ්‍යෙතිෂඥයා ප්‍රකාශ කළත් සේවා දායකයා එය එතරම් ගණන් නොගන්නා තත්ත්යයට පත්කර එම කර්ම විපාක අත්කර දෙයි.

We found this article from Divaina on 2013/11/24.