සුඛ රේඛාව මගින් හෙළි කරන ලෙඩ රෝග පිළිබඳව තොරතුරු

544
සුඛ රේඛාව
සුඛ රේඛාව

චන්ද්‍ර මණ්‌ඩලයෙන් හෝ වෙනත් ස්‌ථානයකින් ආරම්භ වී සුලැඟිල්ලේ මුල පිහිටි බුධ මණ්‌ඩලයෙන් අවසන් වෙන රේඛාව සුඛ රේඛාව හෙවත් බුධ රේඛාව යනුවෙන් හඳුන්වයි. ජීවිතය සමඟ සමීප සම්බන්ධයක්‌ ඇති පුද්ගලයකුගේ සෞඛ්‍ය තත්ත්වය ගැන සටහන් වන අත්ලේ ඇති ප්‍රධානම රේඛාව සුඛ රේඛාවයි. අක්‌මාව සමඟ සෘජුවම සම්බන්ධ වී ඇති නිසා අක්‌මාව රේඛාව නමිනුත් බුධ මණ්‌ඩලයෙන් අවසන් වන නිසා බුධ රේඛාව නමිනුත් මෙම රේඛාව හඳුන්වයි. සුඛ රේඛාවත්, අක්‌මාවත් අතර ඉතා කිට්‌ටු සම්බන්ධයක්‌ ඇති බව දෛව විද්‍යාඥයන් පවා පිළිගෙන ඇත. අක්‌මාවේ ක්‍රියාකාරීත්වය සුළු කාලයකට හෝ නැවතුනහොත් ජීවිතක්‍ෂයට පවා පත්විය හැක. එවැනි වැදගත්කමකින් යුත් අක්‌මාවේ ක්‍රියාකාරීත්වය සඳහන් වන ස්‌ථානය තමයි සුඛ රේඛාව.

සුඛ රේඛාව සමහර අයගේ අත්වල නොතිබෙන්න පුළුවන්. එය කොහෙත්ම බාධකයක්‌ නොවේ. සුඛ රේඛාවක්‌ පිහිටා ඇත්නම් එය බාධකවලින් තොරව පැහැදිලිව තිබිය යුතුයි. එවැනි රේඛාව සුබ ඵල ගෙන දෙයි. සුඛ රේඛාව චන්ද්‍ර මණ්‌ඩලයෙන් ආරම්භ වී කැපුම්, බිඳුම් නොමැතිව පැහැදිලි ලෙස බුධ මණ්‌ඩලයට වැටී සිටීම දීර්ඝායු ලැබීමටත්, නිරෝගී සුව ලැබීමටත් හේතු වෙයි. සුඛ රේඛාව හෙවත් බුධ රේඛාව කැඩී බිඳී හෝ වෙනයම් අන්දමකින් විකෘති වී ඇත්නම් එවැනි අයට නිදන්ගත රෝග වැළඳීමේ ප්‍රවණතාවක්‌ ඇති බවයි ශාස්‌ත්‍රීය නිගමනය. සුඛ රේඛාව කෙටි රේඛා කීපයකින් නිර්මාණය වී ඇත්තේ නම් එවැනි අය අක්‌මාව ඉදිමීමේ රෝගයට ගොදුරු වන බව බොහෝ විට ඔප්පු වී ඇත. මෙම රේඛාව හොඳින් පැහැදිලිව පිහිටා තිබීම ව්‍යාපාරික ක්‍ෂේත්‍රයේ ද වඩා දියුණුවක්‌ පෙන්නුම් කෙරේ.

සුඛ රේඛාව

දුර්වල සුඛ රේඛාව

හොඳ සුඛ රේඛාවක්‌, හොඳ ශීර්ෂ රේඛාවක්‌ ඇත්නම් ඔහුගේ හෝ ඇයගේ මතක ශක්‌තිය ද ඉතා යහපත් වේ. මෙම රේඛාව අක්‍රමවත් ලෙස පිහිටා ශීර්ෂ රේඛාවද සිහින්ව, දුර්වලව තිබේ නම් ව්‍යාපාරික ක්‍ෂේත්‍රයේ දියුණුවට අපහසු වෙයි. බුධ රේඛාව හෙවත් සුඛ රේඛාව දුර්වල වී අනිත් ප්‍රධාන රේඛාත් දුර්වල වී නම් අංශබාගය රෝගය වැළඳිය හැක. බුධ, ශීර්ෂ යන රේඛා දුර්වල නම් එමෙන්ම ජීවන රේඛාවේ අග කතිර ලකුණක්‌ ද ඇති වී නම් එවිට ද ඔහුගේ හෝ ඇයගේ සෞඛ්‍ය දුර්වල වේ. සුඛ රේඛාව, ශීර්ෂ රේඛාව, ජීවන රේඛාව යන රේඛා පිහිටි විට අත්ලේ ත්‍රිකෝණයක සටහනක්‌ ඇති වේ නම් එම සලකුණ ඇති අය ගුප්ත විද්‍යාවට දක්‍ෂකමක්‌ පෙන්වයි.

එමෙන්ම බුද්ධිමත්ය. ශීර්ෂ රේඛාව හා හෘදය රේඛාවෙන් සෑදෙන චතුරස්‍රය පටු වී හෘදය රේඛාව වක්‍ර වී ඇති විට සුඛ රේඛාවද දුර්වල නම් ඇදුම රෝගය සෑදිය හැක. බුධ රේඛාව හෙවත් සුඛ රේඛාව, ශීර්ෂ රේඛාව හරස්‌ රේඛා වලින් කැපී තිබීම මානසික රෝග හා ස්‌නායු රෝග සෑදීමට හේතුවක්‌ වේ. කෙනකුගේ අතක බුධ රේඛා දෙකක්‌ සමාන්තරව පිහිටා තිබිය හැක. එම පිහිටීම ඇති අය වෘත්තීන් දෙකක නියෑලීම පෙන්නුම් කරයි. ඔවුන්ගේ සෞඛ්‍යය තත්ත්වය ද යහපත් ය.

බුධ රේඛාව මැණික්‌ කටුව ප්‍රදේශයෙන් ආරම්භ වීම ව්‍යාපාර දියුණුව පෙන්නුම් කරයි. මෙම රේඛාව ක්‍රම කීපයකින් ඉහළට යා හැකිය. බුධ රේඛාව ජීවන රේඛාවට ස්‌පර්ශ නොවී ඉහළට යැම විවේකයක්‌ නොමැති දුර ගමන් ඇති වීමට හේතු වෙයි. යම් විටකදී මෙම රේඛාව ජීවන රේඛාවට කැපේ නම් එම කාලය ජීවිතය සැක සහිතය. අතේ අයින දෙසට නුදුරුව චන්ද්‍ර මණ්‌ඩලයේ සිට මෙම රේඛාව බුධ මණ්‌ඩලය කරා විහිද යැම විදේශ ගමන් වලට හේතු වේ. බුධ රේඛාව ජීවන රේඛාව කපාගෙන සිකුරු මණ්‌ඩලය දෙසට යයි නම් හේ අන් අයගේ ප්‍රයෝගවලට අසුවෙයි. රේඛාව රැළි ආකාර වීම ව්‍යාපාර බිඳ වැටීම් පෙන්නුම් කරයි. එවැනි අය පිත අධික රෝග වලට ද ගොදුරු වේ. රැළි සහිත එම රේඛා සිකුරු මණ්‌ඩලය දෙසට යාම සල්ලාලකම ද ප්‍රකට කෙරේ. තරංගාකාර බුධ රේඛාවක්‌ තිබීම සුව කිරීමට අපහසු පිත් රෝග, මැලේරියාව, සෙංගමාලය වැනි රෝග ඇති වීමට ප්‍රවණතාවක්‌ වෙයි.

අක්‍රමවත් බුධ රේඛා

බුධ රේඛාව හෘදය රේඛාව අසලින් අවසන් වීම හෘදය රෝග ඇති වීමට හේතු වෙයි. එම අවස්‌ථාවේදී හෘදය රේඛාව කැපී තිබුණේ නම් හෘදය රෝගයකින් මිය යා හැකිය. මෙය ශීර්ෂ රේඛාවට සම්බන්ධ වී ජීවන රේඛාව කුඩා රේඛාවලින් කැපී තිබේ නම් මොලයේ අසනීප හා අක්‌මාවේ රෝග ඇති වීමට හේතු වේ. ඉනිමඟක ස්‌වරූපයෙන් පිහිටා ඇති බුධ රේඛාවන් අශුභදායක වේ. බුධ රේඛා අග කතිර ලකුණක්‌ තිබේ නම් එමගින් පෙන්නුම් කරන්නේ ඇස්‌ පෙනීම දුර්වල වන බවකි. බුධ රේඛා සිහින් රේඛාවලින් කැපී යැම අර්ශස්‌ රෝග වැළඳීමට හේතුවක්‌ වන අතර, දම්වැල් ආකාර ලක්‍ෂණවලින් ආමාශගත ලෙඩ රෝග හඳුනා ගත හැක.

කාගෙ හරි අතක ජීවන රේඛා, බුධ රේඛාවෙන් කැපී ඇත්නම් එම ජීවන රේඛා කැපී තිබෙන වයස සීමාවට අදාළ වයසේදී දරුණු අසනීපයක්‌ සෑදීමට බොහෝ විට ඉඩ ඇත. අශුභ ලකුණුවලින් තොරව සුඛ රේඛාව ගැඹුරට විහිදී ගොස්‌ උඩුකුරුව අතු විහිදී යැම නිරෝගී භාවයට හා ධන ලාභයට හේතු වේ. එම ශාඛා යටිකුරුව විහිදී යැම බලවත් දුෂ්කරතාවලට මුහුණ පා දියුණුව සලසා ගැනීමේ ලක්‍ෂණ වේ. මෙම රේඛාවෙන් විහිද ගිය රේඛාවක්‌ ගුරු මණ්‌ඩලයට හෝ ශනි මණ්‌ඩලයට හෝ රවි මණ්‌ඩලයට ළඟා වීමෙන් ශරීර සෞඛ්‍යය මෙන්ම ධන සමෘද්ධිය ද ඇතිවෙයි.

රේඛා දූෂිත වීමෙන් ඇතිවන අසුභ ඵල චතුරස්‍ර, ත්‍රිකෝණ, ත්‍රීශූල යන මින් කිසිවක්‌ රේඛාවට එකතු වීමෙන් දුරු වේ. රෝස පැහැති වර්ණයෙන් යුතු බුධ රේඛාවක්‌ පිහිටි අය බොහෝ කාලයක්‌ ජීවත් වීමට වාසනාව ලබයි. කහ පාටින්යුත් බුධ රේඛා අක්‌මාවේ විෂමතාවක්‌ වෙයි. බුධ රේඛා මත ඇති දූපත් ලකුණු මගින් ද පුද්ගලයා තුළ ඇති අසනීප තත්ත්වයන් පෙන්නුම් කෙරේ. එම රේඛාවේ පිහිටන දූපත් සලකුණෙන් පෙනහළුවල හා ස්‌වාසනාල වල දුර්වලකම් පෙන්නුම් කරන අතර. එය සැලකිල්ලට ගෙන දුම් පානය මත්ද්‍රව්‍ය භාවිතය වැනි වැරදි ක්‍රියාවලින් වැළකීම යහපත් වනු ඇත. නො එසේ නම් ක්‍ෂය රෝගය, ඇදුම රෝගය වැනි රෝග පහසුවෙන් වැළඳිය හැක.

We found this article from Divaina on 2014/02/02.