ග්‍රහ අපල වලින් දුරුවිමට ශාන්ති කර්ම

1679
ග්‍රහ අපල
ග්‍රහ අපල

[ratings]

ජ්‍යෙතිෂ්‍ය ශාස්‌ත්‍රයට අනුව එදා සිට අද දක්‌වා මනුෂ්‍ය වර්ගයා ග්‍රහචාරයට අනුව තමන් වෙත බලපාන අපල කාලය හෙවත් පෙර කරන ලද අකුසල් පලදෙන කාලයේදී එම තත්ත්වයෙන් මිදීමට විවිධ ශාන්තිකර්ම අනුගමනය කළෝය.

ඒ අතර බෝධි පූජා ශාන්ති කර්මයට ප්‍රමුඛස්‌ථානයක්‌ හිමිවන අතර ඇසතු බෝධිය දැකීමෙන් රෝගයෙන් මිදෙන බව ද එය ස්‌පර්ශ කිරීමෙන් පාපයෙන් මිදෙන බව ද ඇසුරු කිරීමෙන් චිර ජීවනය සැලසෙන බව ද ආයුෂ, ධන ධාන්‍ය, සෞභාග්‍යය සර්ව සම්පත්තිය ලද හැකි බව කවුරුත් පිළිගන්නා මතයකි.

අටවිසි බුදුවරුන් පිට දුන් බෝධීන් අතර නුග, නා, කෑල, පළොල් වශයෙන් විවිධ වෘක්‍ෂ ඇති අතර ඒ එක්‌ එක්‌ වෘක්‍ෂයන්ගෙන් පිටවන්නා වූ කිරණ ශක්‌තිය තුළින් පුද්ගලයන් වෙත පැමිණ ඇති අයහපත් ග්‍රහ තත්ත්වයන්ගෙන් මිදීමට හැකි බව විද්‍යාඥයන් පවා සොයාගෙන ඇති කාරණයකි.

මීට අමතරව පොළවෙන් මතුකරගන්නා මැණික්‌ ගල් ඔප දමා පැළඳීමෙන් ද මෙකී අපල උපද්‍රව තත්ත්වයන් දුරුකර ගැනීමට හැකි බව ජ්‍යෙdතිෂ්‍ය ශාස්‌ත්‍රය ලොවට තිළිණ කළ පැරණි සෘෂිවරුන් විසින් සොයාගෙන ඇති තවත් ශාන්ති කර්මයකි.

ඒ අනුව එක්‌ එක්‌ ග්‍රහයාට හිමි මැණික්‌ ගල් හඳුනාගෙන අදාල අපලකාලය සඳහා එම මැණික්‌ වර්ගය මුදුවකට හෝ පෙන්ඩනයකට සවිකොට පැළඳීමෙන් පෘතුවියෙන් නිකුත් කෙරෙන කිරණ ධාරා පැළඳ සිටින මැණික්‌ ගල් හරහා ශරීර ගතවීම හේතුවෙන් අපල දුරුවී වාසනාවන්ත කාලයක්‌ උදාකර ගත හැකි බව සත්‍යයකි.

ඖෂධ පැන් ස්‌නානය කිරීම ද ග්‍රහ අපලවලින් මිදීමට හැකි තවත් මඟකි. බලපා ඇති ග්‍රහ තත්ත්වයට ගුණ දෙන ඖෂධ වර්ග නැවුම් කළයකට දමා පැය 12 ක්‌ පිරිසිදු ජලයේ පෙඟෙන්නට හැර පෙරාගෙන එදිනෙදා ස්‌නානයෙන් පසු ඖෂධ පැන් නෑමෙන් ග්‍රහ ශාන්තියක්‌ ලැබිය හැකිය.

රවි අපලයට

* රනින් කළ මුදුවක රතු මැණික්‌ අල්ලා දකුණු අතේ වෙදඟිල්ලේ පළඳින්න. නැතහොත් රනින් කළ ඉඹුල් කොළයක ආකෘතියක රතු මැණික්‌ අල්ලා ගෙල පළඳින්න.

* ඉඹුල් පැළයක්‌ සිටුවා සාත්තු කරන්න. ස්‌පර්ශ කරන්න.

* කොකුම්පොතු, වැල්මී, නෙළුම් අල, මනෝසීල, සැවැන්දරා මුල්, පළොල්, දේවදාර යන ඖෂධ කළයට දමා පැන්වත්කර තබා පැය 12 කට පසු ස්‌නානය කරන්න.

සඳු අපලයට

* රිදියෙන් කළ මුදුවක මුතු ඇටයක්‌ අල්ලා දකුණු අතේ සුළැඟිල්ලේ පළඳින්න. නැතහොත් රනින් හෝ රිදියෙන් කළ දිවුල් කොළයක ආකෘතියකට මුතු ඇටය අල්ලා ගෙල පළඳින්න.

* දිවුල් පැළයක්‌ රෝපණය කර සාත්තු කරන්න. ස්‌පර්ශ කරන්න.

* ගිතෙල්, කිරි, පළිඟු, බෙලි, නෙළුම් අල, කවඩි, හක්‌බෙල්ලන් කළයකට දමා පැය 12 කට පසු පෙරා ස්‌නානය කරන්න.

අඟහරු අපලයට

* කොරල් හෝ රතු මැණික්‌ ගලක්‌ තඹ හෝ පස්‌ලෝ මුදුවකට සවිකර පළඳින්න.

* කොලොන් වෘක්‍ෂයක්‌ සිටුවා සාත්තු කරන්න. ස්‌පර්ශ කරන්න.

* බෙලි, සුදු හඳුන්, බැබිල, කනේරුමල්, පෙරුංකායන්, ජටාමාංශ කළයකට දමා පැය 12 කට පසු ස්‌නානය කරන්න.

බුධ අපලයට

*මරකත මැණිකක්‌ රන් මුදුවක යොදා දකුණු අතේ සුළැඟිල්ලේ පළඳින්න. නැතහොත් රනින් කළ කොහොඹ කොළයක ආකෘතියකට සවිකර පළඳින්න.

* කොහොඹ පැළයක්‌ රෝපණය කරන්න. සාත්තු කරමින් ස්‌පර්ශ කරන්න. නිල් මල් වර්ග සිටුවීම ද ගුණදායකය.

*නාමල් රේණු, නෙළුම් අල, විලඳ, ගෝරෝචන, මීපැණි, දී කිරි කළයකට දමා පැය 12 ක්‌ තබා පෙරා ස්‌නානය කරන්න.

ගුරු අපලයට

* රන් මුදුවක පුෂ්පරාග ගලක්‌ අල්ලා දකුණු අතේ වෙදඟිල්ලේ පළඳින්න. නැතිනම් රනින් සැදූ බෝකොළ ආකෘතියකට සවිකර ගෙල පළඳින්න.

* හැකි ස්‌ථානයක බෝ පැළයක්‌ රෝපණය කරන්න. සාත්තු කරමින් ස්‌පර්ශ කරන්න. අඹ, බෙලි වගා කරන්න.

* වැල්මී, කලාඳුරු අල, ඉරිවේරිය, දෑ සමන්, බෝලිද්ද යන ඖෂධ ගෙන කළයකට දමා පැය 12 කට පසු ස්‌නානය කරන්න.

සිකුරු අපලයට

* රිදී මිශ්‍ර පස්‌ලෝ මුදුවක දියමන්ති හෝ සුදු ගලක්‌ අල්ලා පළඳින්න. කරඳ කොළයක ආකෘතියකට එම ගල් අල්ලා කර පැළඳීම ද හොඳයි.

* කරඳ පැළයක්‌ සිටුවා සාත්තු කරන්න. ස්‌පර්ශ කරන්න. සුවඳ කොට්‌ටන්, බැබිල, කලාඳුරු අල, දේවදාර, කටුපිල, ලොත් සුඹුල කළයකට දමා ජලයේ පෙඟෙන්නට හැර පැය 12 කට පසු ස්‌නානය කරන්න.

ශනි අපලයට

* රන් මුදුවක නිල් මැණිකක්‌ අල්ලා දකුණු අතේ මැදඟිල්ලේ පැළඳීම හෝ නුග කොළයක ආකෘතියක්‌ රනින් සාදා එහි නිල් මැණික අල්ලා ගෙල පළඳින්න.

* නුග පැළයක්‌ රෝපණය කිරීම, සාත්තු කිරීම, ස්‌පර්ශ කිරීම ගුණදායකය. ඕනෑම ස්‌ථානයක තිබෙන නුග වෘක්‍ෂයකට පුදසත්කාර කිරීමෙන් සහනය ලබාගත හැක.

* බැබිල, විෂ්ණු ක්‍රාන්ති, ලොත් සුඹුල, කලාඳුරු අල, සතකුප්ප යන ඖෂධ පෙර කී ආකාරයට යොදාගෙන ස්‌නානය කරන්න.

රාහු අපලයට

* රන් මුදුවක ගෝමේද ගලක්‌ අල්ලා දකුණු අතේ සුළැඟිල්ලේ පළඳින්න. රිදියෙන් කළ නාග රූපයක හැඩ ඇති මුදුවකට යොදා පැළඳීමත් සුබයි. වැටකේ කොළයක ආකෘතියකට යොදා ගෙල පැළඳීම ද කළ හැක.

* අඟහරුවාදා දිනයක වැටකෙයියා පැළයක්‌ රෝපණය කර සාත්තු කිරීම, ස්‌පර්ශ කිරීම සුබයි.

* ඉරිවේරිය, කලාඳුරු අල, බෙලි කොළ, රත් හඳුන්, ඊතණ යන ඖෂධ කළයට දමා පැය 12 කට පසු පෙරා ස්‌නානය කරන්න.

කේතු අපලයට

* රත්‍රන් මුදුවකට වෛරෝඩි ගලක්‌ අල්ලා දකුණු අතේ වෙදඟිල්ලේ පැළඳීම හෝ කෙසෙල් කොළයක ආකෘතියකට එම ගල් යොදා ගෙල පැළඳීම කරන්න.

* කෙසෙල් පැළයක්‌ සිටුවා සාත්තු කරන්න.

* කලාඳුරු, ඉරිවේරිය, රසකිඳ, ජටාමාංශ, දෙළුම් යන ඖෂධ යොදාගෙන ඉහත සඳහන් ආකාරයටම ස්‌නානය කිරීමෙන් සහනය ලැබිය හැක.

ඉහත සඳහන් කළ සමහර වෘක්‍ෂ තම ගෙවතුවල සිටුවීම අසීරු කටයුත්තක්‌ බැවින් විහාරස්‌ථානයක හෝ වෙනත් ඕනෑම තැනක ඇති එවැනි වෘක්‍ෂවලට සාත්තු කිරීම කළ හැක.

We found this article from Divaina
Also Sinhala to English Google word to word translation can be found here