සුන්දර සඳු සිකුරු යෝගය

132
සඳු සිකුරු
සඳු සිකුරු

රූමත් තරුණියන් විවාහය පමාවී නිවසට වී සුසුම් හෙළන්නේ කවර ග්‍රහයෝගයක්‌ නිසාද? මේ සියල්ලම අතර දන මන පිනවන සුරූපිණියන් යස ඉසුරින් පිරි ලොවක දන ගත පිනවන්නේ කවරනම් ග්‍රහ බලවේගයක්‌ නිසාද? මේ සියල්ලම සඳු සිකුරු ගේ ග්‍රහ බලපෑම අනුව ගොනු වූවක්‌ විය නොහැකිද?

කේන්ද්‍ර සටහනක එක රාශියක මෙම යෝගය පිහිටීම කාන්තා පක්‍ෂයට බොහෝ හිතකර පිහිටීමක්‌ ලෙස හැඳින්වෙයි. එහෙත් එම ග්‍රහ පිහිටීම විමර්ශනාත්මකව ගොනු කළ යුතු වෙයි.

සඳු ග්‍රහයා සිතට අධිපතිකම් කියයි. විශේෂයෙන් කාන්තාවන් සඳුගේ බලපෑමට අවනතය, ඇගේ රුව ගුණ මෙන්ම මල්වරය, විවාහය, දරුඵල හිමි අහිමිවීම ආදී සියල්ලටම සඳු විශේෂිත බලපෑමක්‌ ගොනු කරයි.

සිකුරු ලෞකික සැප සම්පත්වලට අධිපතියාය. ධනය, බලය, විසිතුරුබව, ප්‍රීතිමත් බව කාන්තාවකට ලබාදෙන්නේ සිකුරුය. ඇගේ විවාහයට මූලික වන්නේද සිකුරු ග්‍රහයාය. මෙම ග්‍රහයන් දෙදෙනාම ස්‌ත්‍රී කේන්ද්‍ර සටහනක එක්‌ රාශියක පිහිටීමෙන් ඇතිවන යහපත කවර අයුරකින් ජීවිතයට බලපෑමක්‌ ගොනු කරන්නේද?

ස්‌ත්‍රී ග්‍රහයෝ

ග්‍රහ මඬුල්ලේ නවග්‍රහයන් අතුරෙන් සඳු – සිකුරු ග්‍රහයන් ස්‌ත්‍රී ග්‍රහයෝ වෙති. දුක – සතුට හමුවේ වහා සංවේදී වන්නේ ස්‌ත්‍රී පක්‍ෂයයි. ආලය, ප්‍රේමය හමුවේ අධි සංවේදීතාවයක්‌ දක්‌වන කාන්තාවන් සුකොමලය, පෙම්බරය, දයාබරය. අතීත ජනකවියා සඳු සිකුරු යෝගය කාන්තාව හා සම්බන්ධ කර උපමාවන්ද ගෙනහැර දක්‌වා තිබේ.

ප්‍රේමයෙන් වෙලීගිය නව යුවළකගේ මංගල රාත්‍රිය පිළිබඳව සුන්දරත්වය සඳු සිකුරු යෝගයෙන් ඔපවත් වන බව කවියා වර්ණනාත්මකව පවසයි.

කුඩා දැරියකගේ කේන්ද්‍ර සටහනක කවරනම් පළාතක මෙම ග්‍රහ සංයෝගය වී නම් ඇය සුරතල් හුරුබුහුටි දැරියකි. ප්‍රියමනාප කතාබහ නිතැතින් හිමිවෙයි. කුඩා පිරිමි දරුවකු වී නම් සුරතල්, ප්‍රිය මනාප, ක්‍රියාශීලී බවක්‌ පෙන්වයි.

යොවුන් වියට එළඹෙන දැරියක නැට්‌ටිච්චියක ලෙස ඇතැම් වැඩිහිටියන් හඳුන්වන්නේ මෙවැනි ග්‍රහ සංයෝගය මතය. දඟකාර, කොළිලොල් බව සහ ඇගේ රූමත් බව නිතැතින්ම අන් අයගේ අවධානය දිනා ගැනීමට සමත්වෙයි.

යුවතියක වෙත මනා රූ සපුවක්‌ හා ආකර්ෂණයක්‌ ඇතිවීම ඇය වටා ගැටවර නෙත් යොමුවීමට හේතුවකි. ඔවුනට ඇගේ එක්‌ බැල්මක්‌, සිනහවක්‌ ඔවුන්ගේ හදවත් මුසපත් කිරීමට සමත්වෙයි.

තරුණියක්‌ කාව්‍ය රචනය, නර්තනය, ගීත ගායනය ආදී කලා කටයුතුවලට යොමුකර රූප රාජිණියක ලෙස කිරුළු දරන්නටද සඳු සිකුරු යෝගය මංපෙත විවර කරවයි.

අතීත රජවරු සිහසුන අහිමිකර ගත්තේද රජ සිටු ආදී ප්‍රභූ පිරිස්‌ කුලල්කා ගැනීමකින් තොරව සුරූපිනියන් නගර ශෝභිනියන් ලෙස බලවත් කොට සමාජයේ ඉහළ තලයක තැබුවේද මෙම යෝගයේ බල මහිමයෙන්ය.

වර්තමානයේ මෙම යෝගය බලවත් වූ තරුණියකට ලාබාල වියෙහිදීම විවාහයක්‌ සඳහා දැවැදි අවැසි නොවෙයි. ඉතා කෙටි කලකින් කලා ලොව බබලවන්නට එවන් තරුණියන් හට මංපෙත් විවර වන්නේද පහසු ආකාරයටය. අතහිත දෙන්නෝද අපමණය.

සඳු සිකුරු හය, අට, දොළහේ පිහිටීම

එහෙත් මෙම යෝගය කවරනම් කේන්ද්‍ර සටහනක වුවද හය, අට, දොළහේ පිහිටීම අයහපත්ය. බේදයකින් තොරව සඳු සිකුරු හයවැන්නේ පිහිටීම මධුමේහය හෙවත් දියවැඩියාව වැනි රෝගයක්‌ වැළඳීමට හේතුවකි. කාන්තා කේන්ද්‍ර සටහනක මෙම යෝගය හය වැන්නේ වීම ශරීරය කෙට්‌ටුකරන රෝග. ගර්භාෂගත රෝග වැළඳීමට හේතුය. බොහෝ ස්‌ත්‍රි පුරුෂයන් අසම්මත රහස්‌ සබඳතා ගොඩනගා ගන්නේ ද මෙම යෝගය හය වැන්නේ පාප පීඩිතව සිටි විටය.

අටවැන්නට මෙහි බලපෑම පුරුෂයකු නම් ලිංගික බෙලහීනතාවයට පත්කරයි. අනවශ්‍ය සබඳතා ඇති වීමත් පොදුවේ ධන ලාභ, ධන හානි ඇතිවීමත් පෙන්නුම් කරයි.

දොළොස්‌ වැන්නට මෙහි බලපෑම ප්‍රසිද්ධිය, ධනය හීන කිරීමත් ලෝකොත්තර නැඹුරුවක්‌ ලෙසත් ගොනුවෙයි. අසරණ සරණ, ආගමික කටයුතු සඳහා ධනය වැයකිරීමත් කාරුණික භාවයත් නිතැතින්ම ඇතිකරයි. මෙම යෝගය අයහපත්ව යෙදීම නීතිමය ගැටලු, නඩුහබ, වන්දි සඳහා මුදල් වැයවීම කායික හා මානසික රෝග සඳහා මුදල් වැයවීම පෙන්නුම් කරයි.

සඳු සිකුරු

කේන්ද්‍ර සටහනක මෙම ග්‍රහ සංයෝගය දෙපසින් හයවැන්නේ, හත්වැන්නේ හෝ දහ වැන්නේ කුජ ග්‍රහයා සිටීම අතිධාවන කාමයෝගයක්‌ ලෙස හැඳින්වෙයි. කුජ සමඟ රාහුද සිටීම එම යෝගය බරපතළ ලෙස ප්‍රබල වෙයි. දැරියක වැඩිවියට පත්වීමට පෙර රහස්‌ සබඳතාවලට ගොදුරු වන්නේ මෙම ග්‍රහ දෘෂ්ටි මූලික වීමෙනි.

මේෂ – වෘශ්චික රාශිවල සඳු සිකුරු පිහිටීමද සරාගී යෝගයකි.

ලාබාල තරුණයන් වැඩිහිටි කාන්තාවන්, කුඩා දැරියන් අපචාර සඳහා ගොදුරු කරගන්නේද සඳු සිකුරු වෙත කුජ රාහුගේ යොමුවීම මතය.

සඳු-සිකුරු යෝගයේ සිකුරු කන්‍යාවේ නීච වීම තුළ අනුන් වෙත නිර්ලෝභීව උපකාර කිරීමට පෙළඹෙයි. ධනය හිමිවුවද දිවියේ ඔපවත්වීම අඩුකරයි. වෘශ්චික රාශිගතව සඳු සිකුරු යෝගයේදී චන්ද්‍රයා නීචවෙයි. එය දියුණුවට යහපත්ය. වහා කෝපවීම විශේෂිත ලක්‍ෂණයකි. කියන දෙය මුහුණටම කියන චරිතයකි. මෙහි සඳහන්ව ඇත්තේ සඳු සිකුරු යෝගයේ කෙටි පැතිකඩකි.

බාධක ග්‍රහයන් හෝ විසිදෙවැනි දෙර්කාණාධිපති ගේ බලපෑම සඳු සිකුරු සිටින රාශියට යොමුවීම ඉතා අයහපත්ය. යහපත මෙන්ම අයහපතද හඳුනා සූදානම්වීම සියලු යහපතට හේතුය. ජ්‍යෙතිෂ ඇදුරන්ගේ නිවැරැදි මඟ දැක්‌ම කේන්ද්‍ර සටහනට අනුගත කිරීම එයට යහපත්වූ පිළිවෙතයි.

We found this article from Divaina on 2013/12/08.