නිවසට දෙවියන්ගේ ඇල්ම බැල්ම ඇති කරගන්නේ මෙහෙමයි

1506
දෙවියන්ගේ
දෙවියන්ගේ

දෙවියන්ගේ පිහිටයි”, “දෙවියන් කෝප කරගන්න එපා”, “දැන් ඉතින් දෙවියන්ගෙ පිහිට විතරයි”, “දෙවියන්ටවත් පේන්නේ නැත්ද?” යන වදන් අපේ සමාජයේ පෙර සිටම පැවත එන නූතනයේද භාවිත වන වදන් පෙළකි. මෙවැනි වදන් නොකියවුණු දෙතොලක්‌ නැති තරම්ය. ඒ තරමටම දෙවියන් හා බැඳී ගිය වදන් ජාති ආගම් භේදයකින් තොරව ස්‌ත්‍රී පුරුෂ භේදයකින් තොරව පෝසත් දුප්පත් භේදයකින් තොරව භාවිත වනු දක්‌නට ලැබේ. යම් කෙනකුට විපතක්‌, කරදරයක්‌, ලෙඩක්‌, දුකක්‌ ආ විට දෙවියන් මතක්‌ වෙනවා. එසේම නව බලාපොරොත්තුවක්‌ ඉටුකර ගන්නට අවශ්‍ය වූ විට දෙවියන් සිහි වෙනවා, තමාට කිසිවෙකුගේ පිළිසරණක්‌ පිහිටක්‌ නොමැති වූ විටද මතක්‌ වෙන්නේ දෙවියන් විතරයි. මෙය සාමාන්‍ය මනුෂ්‍ය ස්‌වභාවයේ පොදු ලක්‍ෂණයක්‌ ලෙස හැඳින්විය හැකියි.

කෙසේ වුවද දේව සංකල්පය ලෝකයේ හා ජීවීන්ගේ සම්භවය තරම් ඈතට විහිදෙන අතර සෑම ආගමික දර්ශනයක්‌ තුළින්ම දෙවියන් පිළිබඳව විශේෂ ඉගැන්වීම් සිදුකර ඇති අතර බෞද්ධ මතයට හා හින්දු මතයට අනුව දෙවියන් පිළිබඳව සිතීමට ලක්‌වැසි බොහෝ දෙනා පෙලඹී ඇත.

බෞද්ධ ඉගැන්වීම්වලට අනුව දෙවියන් යනු තවත් එක්‌ සත්ත්ව කොට්‌ඨාසයක්‌ වන අතර මනුෂ්‍ය තලයට ඉහළින් හා බ්‍රහ්ම තලයට පහළින් දිව්‍ය තලය පිහිටා ඇති බව පිළිගැනේ. හින්දු හා බෞද්ධ ඉගැන්වීම්වල හර පද්ධතියට සමගාමීව දිවෙන වාස්‌තු විද්‍යාව හා විෂය තුළින් දෙවියන් පිළිබඳව වැඩි අවධානයක්‌ යොමුකොට තිබේ. අතීතයේ වාස්‌තු සංකල්ප පිළිබඳව අදහස්‌ ඉදිරිපත් කළ සෘෂිවරුන් හින්දු හා බෞද්ධ දර්ශනය තුළ දේවත්වයෙන් හැඳින්වීමට නිදසුන් රැසක්‌ තිබේ. මෙහිදී විශ්මකර්ම යනු වාස්‌තු සෘෂිවරයෙක්‌ වන අතර බෞද්ධ දර්ශනය තුළ විශ්මකර්ම දිව්‍ය පුත්‍රයා ලෙස හඳුන්වයි. එසේම දෙවියන්ගේ නිර්මාණ ශිල්පියා විශ්වකර්ම වන අතර “මය” යනු අසුරයන්ගේ නිර්මාණ ශිල්පියා බවද ඉපැරැණි වාස්‌තුවේ දක්‌වා ඇත. මේ ආකාරයටම දෙවියන් පිළිබඳව තර්කානුකූලව විවිධ ආගමික දර්ශනයන්හි සාපේක්‍ෂව කරුණු කාරණා ඉදිරිපත් කළ හැකි අතර දෙවියන් නිවසේ වාස්‌තු දෝෂ සඳහා කෙසේ බලපාන්නේද යන්න පිළිබඳව විග්‍රහයන් සිදු කිරීම මෙම ලිපියේ අරමුණ වේ.

දෙවියන්ගේ

නිවසේ ආගමික කටයුතු

නිවසේ ආගමික කටයුතු නිසි පරිදි සිදු කිරීම ඉතා වැදගත් වාස්‌තු රීතියක්‌ බව දැක්‌විය යුතුය. මේ සමග ප්‍රධාන කරුණු කිහිපයක්‌ පිළිබඳව අවධානය යොමුකළ හැක. සෑම ගෘහයකම නිසි තැන නිසි දිශාවේ නිසි පිළිවෙලට ආගමික කටයුතු සිදු කළ යුතු වේ. නිවසේ බ්‍රහ්ම පාදය දේවත්වයෙන් සැලකීමට පෙර සිටම ශ්‍රී ලාංකිකයන් හුරුපුරුදු වී සිටින බව පෙනී යයි. පැරැණි නිවාසවල බ්‍රහ්ම පාදය මත පූජනීය පාත්‍රය වඩා හිඳුවීම හා ආගමික ප්‍රතිමා තැන්පත් කිරීම තුළින් මෙය තහවුරු වේ. එදා පැරැණි නිවාසවල බ්‍රහ්ම පාදය මත තැන්පත් කළ පූජනීය පාත්‍රය නූතන පරම්පරාව විසින් අගෞරව වන ලෙස වීසි කර දමා ඇති බව අප විසින් සිදු කරන නිවාස පරීක්‌ෂාවේදී පෙනී යයි. පූජනීය පාත්‍රය අද ඇත්තේ පඩිපෙළ යට, ගබඩා කාමරවල, කුස්‌සියේ, ඇඳ යට හෝ නිවසේ ලට්‌ට ලොට්‌ට අතරය. මෙවැනි නිවාසවල පොදු ලක්‍ෂණය වන්නේ මූල්‍ය පිරිහීම හා ලෙඩ රෝග බහුල වීමයි.

සෘම ගෘහයකටම දෙවියන්ගේ පිහිට සහ ආශිර්වාදය ලබාගැනීම සඳහා නිවසේ ආගමික වේද දෝෂයන්වලට ලක්‌ නොවන ලෙස නිවසේ ආගමික කටයුතු සිදු කිරීම ඉතා යහපත් වේ. ඔබගේ ආගම කුමක්‌ වුවද ප්‍රශ්නයක්‌ නැත. ඔබගේ ආගමික ශාස්‌තෘන් වහන්සේට පුද සත්කාර කිරීම සහ ගෞරව කිරීම නිසි පරිදි සිදු කරන්නේ නම් දෙවියන් සතුටු වන අතර එසේ නොවන සෑම විටම දෙවියන් අසතුටට පත්වේ. මෙසේ දෙවියන් සතුටු වන සෑම ගෘහයකටම දෙවියන්ගේ ආශිර්වාදය සහ පිහිට ඇති වන අතර දෙවියන් අසතුටු වන සෑම ගෘහයකටම අයහපත් ප්‍රතිඵල ලැබීම වැළැක්‌විය නොහැක.

දෙවියන්ගේ

නිවැරැදි ලෙස ආගමික කටයුතු නිවස තුළ සිදු කිරීම

බුදු පිළිමය – උතුරු ඊශාන හෝ නැගෙනහිර දිශාව බලා වන්දනා කළ හැකි පරිදි නිවසේ බ්‍රහ්ම පාදයෙන් උතුරු කෙටසේ ස්‌ථානගත කරන්න.

පහන් දැල්ල බුදුරජාණන් වහන්සේගේ පැත්තට හරවා තබා ආලෝක පූජාව සිදු කළ යුතුයි.

නිවසේ ප්‍රධාන උළුවස්‌ස උඩ පහන් දැල්වීම හෝ ආගමික ශාස්‌තෘන්ගේ පිළිම පින්තූර නොතැබිය යුතුයි.

මල් පූජා කිරීමේදී හැකි සෑම විටම වර්ණ සහ සුගන්ධ ඇති මල් පූජා කළ යුතුයි.

දානය හෝ පැන් පූජාව සිදු කරන්නේ නම් ඒවා විනාඩි 15-20 කට වඩා නොතබන්න.

බුදු පිළිම හෝ පින්තූර තැන්පත් කිරීමේදී අඩි 05 කට වඩා අඩු උසකින් තැන්පත් නොකරන්න.

දෙමහල් නිවාසවල ආගමික පිළිම තැන්පත් කිරීමේදී සෑම විටම ඉහළ මාලයේ යොදා ගන්න.

දේව රූප සහ බුදු පිළිම සමාන්තරව නොතබන්න.

බුදු පිළිමයට ඉහළින් සීවලී රහතන් වහන්සේගේ පින්තූරය නොතබන්න.

ආවතේව කළ නොහැකි කිසිම තැනක නිවසේ බුදු පිළිම හෝ පින්තූර තැබීමෙන් වළකින්න. (අලංකාරයට තැබීමෙන් වළකින්න)

ආගමික ශාස්‌තෘන් දෙදෙනකුගේ පිළිම එකම තැනක නොතබන්න. (ආගමික ශාස්‌තෘන්ගේ පිළිම තැන්පත් කිරීමේදී දිශාව තීරණය කරනු ලබන්නේ ශාස්‌තෘන් පහළ වුණු භූමි ප්‍රදේශය පදනම් කරගෙනය. ලංකාවට උතුරින් ජම්බුද්වීපය පිහිටා ඇති බැවින් බුදු පිළිම සඳහා ඉතාමත් සුදුසු දිශාව වන්නේ උතුරු දිශාවයි. අනෙකුත් ශාස්‌තෘන් එලෙස දිශාව තීරණය කළ යුතුයි.)

දෙවියන්ගේ ආශිර්වාදය

නිවසක්‌ සඳහා ඉතාමත් සුදුසු සමාධි බුදු පිළිමය වන අතර බුදු සිරස හෝ හිටි පිළිම නිවසේ තැබීම සුදුසු නැත. උතුරු නැගෙනහිර දිශාවේ ප්‍රධාන ද්වාර සහිත නිවසට සුදු පැහැති සමාධි පිළිමයක්‌ යහපත් වන අතර දකුණ, බටහිර ප්‍රධාන ද්වාර සහිත නිවාස සහිත නිවාස සඳහා කහ/තැඹිලි වර්ණ සහිත සමාධි බුදු පිළිම ඉතා යහපත් වේ. කළු වර්ණ සහිත බුද්ධ ප්‍රතිමා නිවසට සුදුසු නොවේ.

කිසිම විටෙක නිවසේ බුදුන් වඳින ස්‌ථානයට බුදු කූඩුව යන වචන භාවිත නොකළ යුතු අතර බුදු මැඳුර යන වචනය භාවිත කළ හැකිය. එසේම බුදු මැඳුර කුඩා පහන් පැළක්‌ ලෙස සකස්‌කොට නිවසින් පිටත නොතැබිය යුතුයි. නිවසින් පිටත බුදු මැඳුර සකස්‌ කරන්නේ නම් එය විධිමත් ලෙස සකස්‌ කළ යුතුයි.

ඔබගේ නිවස ආගමික වේද දෝෂයන්ට ලක්‌විය හැකි අවස්‌ථා කිහිපයක්‌ ඉහතින් පෙන්වා දෙන ලදී. නිවසේ ආගමික වේද දෝෂයන්ට ලක්‌වීම තුළ දෙවියන්ට නිවස අප්‍රිය වන අතර ආගමික දෝෂ නොමැති විට දෙවියන්ට ගෘහය ප්‍රිය වේ. විශේෂයෙන් ආගමික වතාවත් සිදු කරන විට දෙවියන්ට සහ භූමි ඥතීන්ට පින්දීම කළ යුතුයි. දෙවියන්ගේ සිත් සතුටු වන්නේ එවිටයි. ගෘහයේ බුදු පහන ප.ව. 5.30 ත් ප.ව. 6.00 ත් අතර කාලයේදී දැල්විය යුතු අතර පෙරවරු 6 ට පෙර බුදු පහන දැල්වීම ඉතා යහපත් වන අතර මේ නිසා දෙවියන් සතුටු වේ.

ඉහතින් දක්‌වන ලද ආකාරයටම ගෘහයක නිසි පරිදි ආගමික වතාවත් ඉටුකොට සුවඳ දුම් අල්ලා ඉතා පිරිසිදුව පවත්වා ගැනීම හා දෙවියන්ට හා භූමි ඥතීන්ට පින් පෙත්දීම තුළ දෙවියන්ගේ සිත් සතුටු වේ. එය නිවසට ආශිර්වාදයකි. ආගමික ශාස්‌තෘන්ට අගෞරව වන ලෙස කටයුතු සිදුවන ගෘහයක්‌ කෙරෙහි දෙවියන්ගේ සිත් අසතුටු වන අතර ඒවාට දෙවියන්ගේ ආශිර්වාදය නොලැබෙනු ඇත.

We found this article from Divaina on 2013/10/13.